روپیئے نوں بچاؤن لئی یورو، پاؤنڈ تے درہم دی برآمد تے پابندی
وچار ڈیسک
May 9th, 2008
اسٹیٹ بینک نے ایکسچینج کمپنیاں راہیں برطانوی پاؤنڈ، یورو اتے درہم دی کیش برآمد تے بنا کوئی ویلا متھے روک لا دتی ہے۔ دوجے پاسے بینکاں وچکار ڈالر اوپن مارکیٹ دے مقابلے تے مہنگا ہو گیا ہے۔ مرکزی بینک دے بلارے وسیم الدین دا آکھنا ہے کہ ایکسچینج کمپنیاں ولوں کرنسیاں دی کیش برآمد فوری طور تے روک دتی گئی ہے۔
ایکسچینج کمپنیاں وکھریاں کرنسیاں نوں مرکزی بینک دی اجازت نال کیش لے کے جاندیاں سن تے اوہدے بدلے ڈالر لیائے جاندے سن۔ فاریکس مارکیٹ دے وسیلیاں موجب 2001ء وچ وی حکومت تے روپئے دی قدر بچاؤن لئی ایہہ کم کیتا سی جیہدے نال ڈالر دا کالا دھندا شروع ہو گیا سی۔ جمعے دے دیہاڑے بینکاں وچکار ڈالر 69 روپئے اتے 70 پیسے وچ وِکیا جدوں کہ کھلی منڈی وچ ایہہ 69 روپئے 20 پیسے رہیا۔ فاریکس ایسوسی ایشن دے پردھان ملک بوستان دا آکھنا ہے کہ مرکزی بینک نوں ایکسچینج کمپنیاں دی تھاں بینکاں دے خلاف کروائی کرنی چاہی دی ہے کیوں جے بینکاں روپیئے دی قدر تے سٹے بازی کر رہیاں نیں۔
