پاکستانی روپیہ پہلاں ہی تھوڑے چر وچ ڈالر دے مقابلے وچ سٹھ توں ستر تیکر اپڑ چکیا ہے حالاں ڈالر آپ وی ڈگ رہیا ہے۔بہت سارے ماہراں نوں ڈر ہے جو روپیہ ڈگدا ڈگدا ستر اسی دی حد ٹپ کے ڈالر دا سو وی ہو سکدا ہے۔ پاکستانی کرنسی دے ایس طرحاں ڈُبن نال بہت وڈا بحران پیدا ہووے گا جیس دا شکار پھیر غریب لوک ہوون گے کیوں جو شیواں دے مُل ہور اُتے چڑھ جان گے۔ بھیڑی گل ایہہ ہے جو حکومت نوں نہ تے ایہہ سمجھ آرہی ہے تے نہ ایس بارے اوہ کجھ کر ہی رہی ہے۔
پاکستانی کرنسی دی ڈُبکی دی مڈھلی وجہ بیوپار وچ گھاٹا، ودھدیاں ہوئیاں قیمتاں تے لوڑوں گھٹ جعلی طور تے رکھی شرح سود ہے۔ اہناں ساریاں گلاں پاروں لوکاں دا پاکستانی کرنسی توں اعتبار مُک گیا ہے۔ لوکاں روپئے مارکیٹ وچ ویچنے شروع کردتے ہین تے ایہہ چھیتی نال ڈوہنگھ وچ لتھدا جا رہیا ہے۔ ایس دی لہائی کِتے رُکدی نظر نہیں آوندی تے جے ایہہ ستر اسی دی حد ٹپ گیا تے پھیر بہت وڈھا بحران پیدا ہووے گا۔ اوس طرحاں دا بحران جیویں میکسیکو تے ملائشیا وچ ہویا سی۔ اوہناں حالاں وچ کوئی تھاں لُکن لئی نہیں لبھے گی۔
پاکستان وچ تجارت دا خسارہ سولہ ارب توں اُتے پہنچ گیا ہے۔ ایس نوں پورا کرن لئی پنج ارب دے کول تے پردیسی فارن کرنسی گھلدے ہین تے باقی گیاراں ارب دوجے ملکاں دی امداد تے قرضیاں نال پورا کیتا جا رہیا ہے۔ ایڈا وڈا خسارہ بہتا چر نہیں چل سکدا تے اخیر ایس دا دھماکہ ہو جانا ہے۔
چیزاں دیاں چڑھدیاں قیمتاں دا در (شرح ) اٹھاراں فیصد دے کول ہے جیہڑا کافی وڈھا ہینر ہے عام غریباں نال۔ پر ایس توں ہور وی وڈھا ہنیر ہے جو سود دی شرح افراط زر نالوں وی گھٹ ہے۔ جیس دا مطلب ہے جو عام بندے دی بچت تے لابھ دی تھاں گھاٹا پے رہیا۔ امیر لوکاں تے اپنے اکاؤنٹ ڈالراں تے پاؤنڈاں وچ رکھے ہوئے ہین تے اوہناں نوں کوئی فرق نہیں پیندا۔ سگوں اوہناں نوں فائدہ ہے اوہ لوکاں دیاں بچتاں مفت توں وی ودھ لوکاں دے اپنے خرچے تے ورت رہے ہین۔ ایہہ وی وڈھا بھکانہ ہے جیہڑا پھٹے ہی پھٹے۔
آئی ایم ایف تے ورلڈ بینک دے ماہر کہندے نیں جو ڈاکٹر عشرت تے شمشاد نے شرح سود تھلے رکھ کے پاکستان دی کرنسی نوں برباد کر چھڈیا ہے۔ ہن چھیتی ہی پاکستان پھیر ٹھوٹھا لے کے آئی ایم ایف دے دوارے کھڑا بھکھ منگ رہیا ہووے گا۔ ہر مہینے پاکستان دے دیوالیہ ہوون دیاں کہانیاں ہوون گیاں تے لوک ہور بھکھے مرن گے۔
