امریکی کمپنی ایس اینڈ پی دے پاکستانی دی قرضداری ساکھ گھٹاؤن مگروں موڈیز انوسٹرز سروس نے وی پاکستان دی ساکھ ایہہ آکھدیاں گھٹا دتی ہے پاکستان دی معاشی تے سیاسی حالت ودھیری وگڑ گئی ہے۔موڈیز نے سرکاری بانڈز دی ساکھ نوں B1 توں B2 کر دتا ہے جیہڑا کہ سرمایہ کاری گریڈ توں پنج درجے ہیٹھاں ہے۔
پاکستان وچ روپیئے دا کھلار (افراط زر) 1970ء توں مگروں ہن ایس ویلے سبھ توں اُتلی پدھر تے ہے تے روپیئے دی قدر اپنی تاریخ دی سبھ توں ہیٹھلی پدھر تے اپڑ گئی ہے۔ وپاری تے معاشی گھاٹیاں نے خطرے دے ٹل وجا دتے ہین۔ موڈیز انوسٹرز دا آکھنا ہے کہ پاکستان دی معاشی حالت تے کرنٹ اکاؤنٹ وچ گھاٹا پاکستان دے جی ڈی پی توں 7 فیصدی ودھ سکدا ہے۔ ایہدے نال سینٹرل بینک دے وسیلیاں تے دباء ودھے گا تے روپیئے دے کھلار دا دباء وی ودھ جاوے گا۔
موڈیز انوسٹرز دے اک معاشی ماہر آنندا مترا دا آکھنا ہے کہ پاکستان وچ رلویں سرکار دے جھیڑے کھل کے ساہمنے آ رہے ہین تے ایہدے نال اوہ پالیسیاں نہیں بنن گیاں جیہڑیاں میکرو اکنامکس دے وگاڑ نوں ملک وچ سدھار سکن۔ اہناں خطریاں توں مگروں وی موڈیز نے پاکستان بارے اپنیاں آساں ہو ودھا لئیاں ہین کیوں جے اوہناں نوں آس ہے کہ پاکستان نوں باہروں ہور قرضے ملن گے۔
دوجے پاسے امریکی کمپنی سٹینڈرڈ اینڈ پووئر (S&P) نے اپنی آس ہور گھٹا دتی ہے کیوں جو اوہناں نوں ڈر ہے کہ مندے سیاسی حالات وچ پالیسیاں بناؤن دا کم چنگی طرحاں نہیں ہو سکے گا۔ ایس مہینے دے شروع وچ پاکستان دی سٹیٹ بینک دی گورنر شمشاد اختر نے آکھیا سی کہ اوہناں نوں آس ہے کہ سجن ملکاں تے دوجے وڈے قرضے دیون والیاں ولوں پاکستان نوں 3.5 بلین ڈالر دا قرضہ ملے گا۔
