سخت مالیاتی فیصلیاں نال معیشت ہور وختاں وچ پے جاوے گی: ماہر

تجارتی تے صنعتی حلقیاں نے اسٹیٹ بینک ولوں مالیاتی پالیسی ہور سخت کرن تے سود دی شرح ودھان دے فیصلے دی مخالفت کردیاں ہوئیاں کہیا ہے کہ ایہدے نال پہلوں توں وختاں وچ پئی معیشت تے ہور بھیڑے اثر پین گے، کاروباری تے صنعتی کم ماٹھے پے جاون گے تے اوکڑاں نال دو صنعتاں بند ہوسکدیاں ہین۔

وفاق ایوان ہائے صنعت تے تجارت دے صدر تنویر احمد شیخ نے چنتا دا وکھالا کردیاں ہوئیاں کہیا کہ اہناں کماں نال بینکاں دے سرمائے دی فراہمی دی صلاحیت تے اثر پوے گا تے صنعتاں نوں قرضے دی فراہمی اوکھی تے مہنگی ہو جاوے گی۔

اک گویڑ موجب دسیا جاندا ہے کہ ایس توں بینکاری نظام گھٹو گھٹ باٹھ ارب روپئے باہر چلے جاون گے تے بینکاں دی صنعت وچ ویہہ فیصد تیکر کمی آون دا ڈر ظاہر کیتا جارہیا ہے۔

اسٹیٹ بینک نے بینکاں نوں پابند کیتا ہے کہ اوہ کھاتے داراں نوں گھٹو گھٹ پنج فیصد منافع دیون۔ دوجے پاسے مقامی اسٹاک مارکیٹ بوہتا دبا وچ آگئی ہے تے صرف اک دیہاڑی یعنی جمعے دے دیہاڑ انڈیکس وچ چھ سو پوائنٹس توں بوہتے دی کمی دے نتیجے وچ سرمایہ کاراں نوں ارباں روپیاں دے نقصان دا ساہمنا ہے۔

ہور ایہہ کہ بازار حصص وچ بحران ورگی حالت، بینکاں دے شیئرز دیاں قیمتاں وچ وڈے پیمانے تے کمی تے وکری دادبا ویکھیا جا رہیا ہے، جدوں کہ ہور شعبے وی مندی دے اثر توں محفوظ نہیں تے سرمایہ کاراں وچ چنتا تے بے اعتمادی ودھ رہی ہے۔ ماہراں دا کہنا ہے کہ ملک وچ ودھدی ہوئی سیاسی بے یقینی نال وی سرمایا کاراں دا اعتماد گھٹیا ہے۔