ایشیاء وچ ہُن تائیں وِکن والا سبھ توں وڈا ہیرا ہانگ کانگ وچ ویچیا گیا اے ۔ 25٫41 کروڑ رُپئے وچ وِکن والا ہیرا 101٫27 کیرٹ دا ہے۔
ہیرے دی بولی لواون والی کمپنی کرسٹی دے مطابق ایہہ ہیرا پچھلے 18 ورہیاں وچ وِِکن والا سبھ توں وڈا بے رنگا ہیرا اے۔
کرسٹی دے مطابق اوہ ہُن تائیں سو کیرٹ توں ودھ دے چار ہیرے وِکا چُکی ہے۔ ہانگ کانگ وچ وِکیا ہویا ایہہ ہیرا اک تاج تے جڑیا ہویا اے۔ کرسٹی دے مطابق اوہدی ایہہ ہُن تائیں سبھ توں وڈی بولی ہے۔ کسے ٹیبل ٹینس دی گیند دے جوڑ برابر ایہہ ہیرا 460 کیرٹ دے ہیرے دے اک وڈے جیہے ٹوٹے توں شنگھار کے تیار کیتا گیا اے۔ ایس ہیرے دے 92 کور نیں۔ کسے وی ہیرے دا مُل اوہدے کوراں توں اِی لایا جاندا ہے۔ جیویں ہیرے دے جِنے کور ہون گے اوہدا مُل اوہناں بوہتا ہووے گا۔
ہانگ کانگ وچ کرسٹی نے تقریباً 250 کروڑ رُپئے دے گہنیاں دی بولی لوائی اے۔ ایہدے وچ ایہہ ہیرا وی شامل اے۔ کرسٹی نے ایس ہیرے نوں نیلام کرن والے شخص دا ناں تے نہیں دَسیا لیکن ایہہ ضرور دَسیا کہ بولی وارے ٹیلیفون تے بولی لوا کے ہانگ کانگ دے اک آزاد شخص نے ایہنوں خرید لیا اے۔
ایس ہیرے نے پورے ہانگ کانگ وچ تھرتھلی پائی ہوئی سی۔ ہُن ایس ہیرے دے مالک نوں ہیرے دا ناں رکھن دا حق مل جاوے گا۔ کرسٹی انٹرنیشنل دے ڈائریکٹر فینکوئس کریل نے دَسیا کہ بے رنگیاں ہیریاں دی کھیتر وچ وِکن والا ایہہ ہُن تائیں سبھ توں مہنگا ہیرا ہے۔ فینکوئس کوریل کا کہنا سی، " ایس ہیرے نے پچھلے سارے ریکارڈ توڑ دِتے نیں۔ ایس ہیرے دی شکل تے ایس دے مُل نے سبھناں نوں حیران کر رکھیا اے۔" فینکوئس کوریل نے دَسیا کہ بولی دے وارے پورے ہال دا ماحول بے حد زبردست سی۔ ایہہ ہیرا دکھنی افریقہ دی کان " پریمیئر مائن" چوں کڈھیا گیا اے۔ ایہہ کان دکھنی افریقہ دی سبھ توں وڈی ہیریاں دی کان اے۔ ایسے اِی کان چوں دنیا دا سبھ توں وڈا ہیرا "کلنن وی پُٹ کے کڈھیا گیا سی۔
