پاکستان تے باہرلے قرضے ودھ کے44 ارب 59 کروڑ ڈالر ہوگئے : وسیلے
وچار ڈیسک
May 31st, 2008
ایس مالی سال وچکار غیر ملکی قرضے گھٹو گھٹ ساڈھے پنج ارب ڈالر ودھے ہین جدوں کہ سال مکن وچ حالی چار ہفتے رہندے ہین۔ ایس سال ہن تیکر ہوون والے ایس وادھے دے نال پاکستان تے باہرلے قرضیاں داحجم ودھ کے چوتالی ارب اُناٹھ کروڑ ڈالر ہو گیا ہے۔
حکومتی ٹولے ایس دی وڈی وجہ ادائیگی دے توازن دے ودھدے ہوئے خسارے نوں کہہ رہے ہین۔ملک وچ نافذ فسکل ریسپونسبلٹی اینڈ ڈیٹ لمیٹیشن ایکٹ ہیٹھ حکومت ہر سال باہرلے قرضیاں وچ مجموعی پیداوار دے تناسب 2.5 فیصد دی شرح توں کمی دی پابند ہے۔
ایس سال حکومت نوں باہرلے قرضیاں دے حجم نوں جی ڈی پی دے 27 فیصد توں گھٹ کے 24.5 فیصد کرنا سی۔پر تجزیہ کاراں دا کہنا ہے کہ ایس سال معیشت دی جیہڑی صورت حال رہی اُس وچ حکومت لئی ایہہ حدف حاصل کرنا ممکن نہیں تے ایہہ تناسب ستائی فیصد ہی رہوے گا۔
ماہراں دا کہنا ہے کہ ایس سال دے نو مہینیاں وچکار حکومت نے پنج ارب اٹھونجاہ کروڑ ڈالر دے بیرونی قرضے لئے تاں جو جاری اکاؤنٹ دے خسارے نوں پورا کیتا جاسکے۔جون دو ہزار ست وچ ملک تے باہرلے قرضیاں دا بھار اُنتالی ارب ڈالر سی جیہڑا ہن ودھ کے ملکی تاریخ دی اُچی پدھر تے اپڑگیا ہے۔
کرنٹ اکاؤنٹ دے خسارے وچ وادھے کارن حکومت تے باہرلے قرضے لین لئی دبا دوھیا جدوں کہ زرمبادلہ دے ذخیرے وی ایس مقصد لئی ورتے گئے۔پاکستانی زرمبادلہ دے ذخیریاں پچھلے کجھ مہینیاں وچ چار ارب ڈالر توں ودھ کمی توں مگروں ایس ویلے گھٹو گھٹ گیاراں ارب ڈالر رہ گئے ہین۔
