وزارت خزانہ ولوں تریہہ جون نوں مکن والے مالی سال ولوں جاری کیتے اقتصادی سروے وچ کہیا گیا ہے کہ مالی سال دو ہزار ست تے اٹھ وچکار معیشت دے کئی شعبے سست روی دا شکار رہے تے اقتصادی نمو دی رفتار ، پیسے دے کھلار دی شرح، مالیاتی خسارے تے سرمایا کاری سنے اقتصادی کارکردگی ولوں ہدف پورے نہ ہوسکے۔
اسلام آباد وچ اک پریس کانفرنس وچ وزیر خرانہ نوید قمر نے اقتصادی سروے پیش کردیاں ہوئیاں کہیا کہ ایہہ سال پاکستانی معیشت لئی بھیڑا رہیا تے ملک دے وچ تے باہر ہوون والے کئی سیاسی تے معاشی واقعیاں نے معیشت تے بھیڑے اثر پائے۔
معیشت دے کئی شعبیاں دی کارکردگی دسدیاں ہوئیاں وزیر خزانہ نے کہیا کہ ایس سال اقتصادی نمو دی شرح دا ست اعشاریہ دو فیصد دا ہدف پورا نہ ہوسکیا تے شرح نمو پنج اعشاریہ اٹھ فیصد رہی جیس وچ زراعت دا حصہ چار اعشاریہ اٹھ دے متھے ہوئے ہدف دے مقابلے وچ صرف ڈیڈھ فیصد رہیا۔ وزیر خزانہ نے دسیا کہ زراعت وچ اینی مندی دی وجہ پاکستان دی وڈیاں فصلاں دی خرابی ہے جنہاں وچ تن فیصد دے حساب نال کمی ہوئی جدوں کہ متھے ہوئے ہدف موجب اوہناں نوں اٹھ فیصد توں ودھ دی شرح نال اپنی پیداوار ودھاونی سی۔
انج آساں موجب صنعتی شعبے وچ باراں فیصد توں ودھ ترقی دی آس سی پر اوہناں دی شرح پنج فیصد توں وی گھٹ رہی۔ وزیر خزانہ موجب پچھلے پنجاں سالاں وچکار ملکی معیشت ست فیصد دی اوسط نال ترقی کر دی رہی پر ایس سال ایس دی قدر اچن چیتی گھٹی ہے جیس وچ کجھ مقامی تے بین الاقوامی کارن رلتی ہین۔
سروے موجب ایس سال پیسے دے کھلار دی شرح دس فیصد توں کجھ بوہتا رہی جیس وچ بوہتا حصہ خوراک تے تیل دی ودھدی ہوئی عالمی قیمتاں دا ہے۔ وزیر خزانہ نے کہیا کہ اہناں دوہواں کارناں توں وکھ پچھلی حکومت دے سٹیٹ بنک توں قرضے لین دے رجحان نے وی پیسے دے کھلار دی شرح ودھائی۔
بجٹ دی تیاری وچکار حکومت نوں جیس اک ساریاں توں وڈے چیلنج دا ساہمنا ہے تے جیہڑے آون والے مالی سال دے وچکار وچ اوکڑاں دا کارن بنے گا اوہ مالیاتی خسارے نوں چوکھا ودھایا ہے جیس دی شرح ست فیصد رہی جدوں کہ ایس لئی چار فیصد دا ہدف متھیا گیا سی۔ وزیر خزانہ نے دسیا کہ اینے مالیاتی خسارے دی وڈی وجہ تیل تے ہور مداں وچ دتی جاون والی سبسڈی ہے۔
سرمایا کاری وی معیشت دے ایس عوامی منفی رجحان متاثر ہوئے بنا نہ رہ سکی تے ایس دی شرح بائی اعشاریہ نو توں گھٹ ہو کے اِکی اعشاریہ چھ فیصد رہ گئی۔
سروے موجب ایس سال دے وچکار سٹیٹ بنک نے سخت مالیاتی پلیسی جاری رکھی جیس کارن سرمائے دے کھلار وچ کجھ کمی ہوئی ہے تے نجی شعبے نوں دتے جاون والے قرضیاں دی شرح وچ دو فیصد وادھا ریکارڈ کیتا گیا۔
سروے موجب ودھدا ہویا تجارتی خسارہ اک ہور وڈے چیلنج دے طور تے ساہمنے آیا جیہڑا کہ ستاراں ارب ڈالر تیکر اپڑ گیا ہے جدوں کہ ایس دا ہدف گیاراں ارب ڈالر تیکر رکھیا گیا سی۔ ایس مالی سال وچ پاکستان دیاں برآمدات تیراں توں ودھ کے پندراں ارب ڈالر تے درآمدات بتی ارب ڈالر توں ودھ رہیاں۔
ایس اک ورہے وچ باہرلے قرضیاں دی مد وچ وی پنج ارب ڈالر وادھا ریکارڈ کیتا گیا جیہڑا کہ ودھ کے پنتالی ارب ڈالر ہو گئے۔ انج غیر ملکی زرمبادلہ دے ذخیریاں وچ تن ارب توں ودھ دی کمی ہوئی جیہڑی اپریل دے مہینے وچ باراں ارب ڈالر تیکر اپڑ گئے سی۔
وزیر خزانہ نے دسیا کہ خوراک دیاں ودھدیاں قیمتاں دے کارن سارے جگ وانگوں پاکستان وچ وی غربت ودھی پر اوہ ایس بارے وچ پچھلے خوراک دے جاری کیتے ہوئے حساب نوں بھروسے دے قابل نہیں سمجھدے۔ اوہناں کہیا کہ ایسے مڈھ تے غربت دیاں حداں جانن لئی حکومت اک نواں سروے کروائے گی تے ایسے بنیاد تے ہی غربت دے مُکا لئی پلیسی بناوے گی۔
سروے موجب سال دو ہزار چھ تے ست وچکار روزگار دے ست لکھ نویں موقعے پیدا ہوئے جیہڑا کہ پچھلے پنجاں سالاں وچ پیدا ہوون والی سوا دوکروڑ نوکریاں دے مقابلے وچ گھٹ رہی۔ ایس دے مقابلے وچ بے روزگار بندیاں دی گنتی اِکتیہہ لکھ توں گھٹ ہو کے چھبی لکھ ہو گئی۔
ایس وچکار جنہاں شعبیاں وچ کجھ بہتری نظر آئی اہناں وچ سروسز، تعمیراتی شعبے تے باہرلے ملک توں ترسیلات زر دی شرح شامل نیں۔ وفاقی وزیر نے ایہہ خوشخبری وی سنائی کہ پاکستان وچ فی کس آمدن نو سو چھبی ڈالر توں ودھ کے اک ہزار پچاسی ہو گئی ہے۔
