دنیا وچ تیل ویچن والے ملکاں دی ستھ 'اوپیک دے چیف عبداللہ البدری نے دسیا ہے کہ جون دی 22 تاریخ نوں سعودی عرب وچ اک اکٹھ ہووے گا جیہدے وچ دنیا وچ سبھ توں وڈے تیل ویچن والے تے ورتن والے ملکاں دے 'ہیڈ آف سٹیٹ' دی پدھر دے لوک رلتی ہوون گے تے دنیا وچ تیل دے ودھدے ہوئے مُل بارے گل بات کرن گے۔
عبداللہ البدری نے دسیا کہ ایہہ اکٹھ جدہ وچ ہووے گا جیہدے وچ سارے ہیڈ آف دی سٹیٹ رل بیٹھن گے تے ایس گل تے گوہ کرن گے کہ جگ وچ تیل دا مُل اینا کیوں ودھیا ہے۔
