پاکستان وچ تے مہنگائی نے لوکاں دی باں باں کروائی ہی ہوئی ہے پر ہندوستان وچ وی پچھلے ست ورھیاں وچ مہنگائی ایس ویلے سبھ توں اُچی پدھر تے ہے۔ معاشی صورت حال ویکھن والے سوجھواناں دا آکھنا ہے کہ سارے جتناں مگروں وی ہندوستانی حکومت کولوں مہنگائی دا دیو سانبھیا نہیں جا رہیا ہے تے وستاں دے مُل دنوں دن ہور چڑھ رہے ہین۔
چین وچ وی مہنگائی اپنی سخر تے ہے تے وستاں دے مُل وچ 8.5 فیصدی وادھا ہو گیا ہے۔ دوجے پاسے امریکہ وچ وی اج اک مہینے وچ سبھ توں ودھ مہنگائی دسی جا رہی ہے۔ ہندوستان وچ ایس ہفتے لوڑ دیاں وستاں دے مُل وچ وادھے دی شرح 8.75 فیصدی دسی گئی ہے۔ وستاں دے مُل وچ وادھے دی شرح وچ وادھا کھاون پیون دیاں وستاں دے مُل وچ وادھے پاروں ہو رہیا ہے۔
ہندوستانی حکومت نے لوڑیندیاں وستاں دے مُل گھٹاؤن لئی کئی جتن کرن دا اعلان کیتا ہے پر عالمی منڈی وچ تیل دے مُل ودھن نال مہنگائی گھٹن دی تھاں ودھدی جا رہی ہے۔ سوجھواناں دا آکھنا ہے کہ حالے ایس مہنگائی دے گھٹن دا کوئی پتہ تھوہ نہیں ہے۔ ہندوستانی حکومت لئی ایہہ مہنگائی ایس لئی وی مارُو ہے کیوں جے آؤن والے مہینیاں وچ کئی ریاستاں وچ چوناں وی ہوون والیاں ہین۔
