پاکستان پیپلز پارٹی دی مخلوط حکومت ولوں نویں مالی سال لئی پیش کیتے جاون والے بجٹ تے کراچی دے شہریاںنے مایوسی دا وکھالا کیتا ہے۔ اوہناں کہیا حکومت نے عام بندے لئی بجٹ وچ کوئی ریلیف نہیں رکھیا ہے۔وائس آف امریکہ نال گل بات وچ کجھ شہریاں دی رائے ایہہ سی :
بجٹ کیہہ ہے۔ ایتھے بس مہنگائی بجٹ ہے۔ باراں سو روپئے ودھائے ہین۔ باراں سو وچ نیانیاں نوں پڑھا لواں، راشن میرے گھر ڈھائی ہزار دا پیندا سی ہن ساڈے چار دا پیندا ہے۔ ساڈے ست ہزار میری تنخواہ ہے۔ کتھوں پورا کراں ؟'
' تنخواہ پینشن نال ساڈا کیہہ تعلق ہے۔ اسیں تے دیہاڑی دار بندے ہاں۔ روز کماونے تے کھانے ہاں۔ سو روپئے روز کماون والا کیہہ تیل خریدے گا، کیہہ آٹا خریدے گا، سبزی خریدے گا۔ کیہہ کماوے گا ،کھاوے گا کیہہ ؟'
' ہزار روپیہ لے کے ہنے بازار چلو۔ مہینے دا راشن وی نہیں آوے گا پورا۔ جنہاں دی پینتی چالی ہزار تنخواہ ہے اوہناں دی دس ہزار ودھ جاوے گی تے ظاہر ہے فیدا اوہناں نوں ہووے گا'۔
میں تے سرکاری نوکر ہاں۔ چنگا ہے بجٹ، پرسارے لوکاں لئی بہتر ہووے، خاص کر غریب لوکاں لئی ۔ ' میرے چار نیانے ہین، میرا تے چلو گزارا ہو جاندا ہے۔ انشااللہ ہو جاوے گا پر لوکاں لئی صحیح نہیں ہے۔ ''بجلی بند ہو جاندی ہے۔ بجلی دا بل پہلے توں وی بوہتا آرہیا ہے۔ پہلے آوندا سی ساڈھے ست سو ہن آوندا ہے اُنی سو گیس دا بل پہلوں آوندا سی اک سو پنجاہ ہن آوندا ہے ست سو پنجاہ۔ کتھوں کرے گا غریب بندہ گزارا، چوری چکاری تے ہی لگے گا اوہ۔'
' تسی کہندے او اسیں بجٹ لیا رہے ہاں عوامی بجٹ، کتھوں آیا عوامی بجٹ ایہہ ؟ لوکاں دے زخماں تے لون چھڑکیا گیا ہے '۔
شہری کہندے ہین کہ بجٹ وچ نویں ٹیکساں توں مگروں عام بندے دی حکومت توں آساں مکدیاں جارہیاں ہین تے انج عالمی منڈی وچ تیل دیاں قیمتاں مسلسل ودھن نال اوہناں نوں ڈر ہے آون والا ویلا اوہناں لئی بوہت اوکھا ہووے گا۔
