چار وزیر اعظماں، سیکڑیاں وزیراں تے قومی دولت برباد

ملک وچ وزیر اعظم تے اک ہی ہے پر سیکورٹی تے پروٹوکول چواں ہستیاں نوں وزیر اعظم دے بروبر مل رہیا ہے انج ایہہ خرچے پہلوں توں چار گنا ودھ ہو گئے ہین۔ ملک نوں پیش سماجی تے مالی اوکڑاں دے مگروں وی حکومتی خرچے گھٹن دی بجائے ودھ رہے ہین تے وڈیاں ہستیاں دے پروٹوکول تے اوہناں دی حفاظت تے کئی گنا خرچے کیتے جارہے ہین۔

وسیلیاں موجب ملک دی تاریخ وچ ایہہ پہلا موقع ہے کہ چار وڈیاں ہستیاں نوں اِکو ویلے وزیر اعظم پاکستان دے بروبر پروٹوکول مل رہیا ہے اوہناں وچ وزیر اعظم آپوں اوہناں توں وکھ پیپلز پارٹی دے پردھان مسلم لیگ ن دے پردھان تے وفاقی مشیر داخلہ وی رلتی ہین جنہاں دے پروٹوکول تے کروڑاں روپئے خرچ کیتے جا رہے ہین۔

ایس توں وکھ پلس دی وڈی گنتی تے موبائل گڈیاں ، وفاقی تے صوبائی وزیراں، مشیراں تے ہور پربندھیاں تے وڈیاں سیاسی ہستیاں دی حفاظت تے لگے ہین جدوں کہ دوجے پاسے وسیلیاں دی کمی کارن عرب ملکاں توں خوراک تے مڈھلیاں لوڑاں لئی امداد منگی جارہی ہے۔

اقتصادی ماہراں کہیا ہے بے جا خرچیاں کارن ملک نوں مالی وخت پیا ہویا ہے۔ زرمبادلہ دے ذخیرے گھٹ رہے ہین جدوں کہ غریب لوکائی لئی کوئی ریلیف نہیں ہے۔ خرچے وفاقی پدھر تے ہی نہیں ودھ رہے سگوں صوبیاں دی حالت وی وفاق توں اڈ نہیں ہے، چواں صوبیاں وچ وڈیاں وڈیاں کابینہ بنائیاں گئیاں ہین خاص کر بلوچستان ورگے نکے صوبے وچ وڈی صوبائی کابینہ دے کارن خرچے ودھ رہے ہین۔

اقتصادی ماہراں دا کہنا ہے کہ مالی اوکڑاں توں نکلن لئی پہلا قدم خرچیاں وچ کٹوتی ہوندی ہے پر ایس دے الٹ خرچے مسلسل ودھ رہے ہین دوجے پاسے اسٹیٹ بینک وی حکومت ولوں لئے جاون والے مرکزی بینک دے قرضیاں تے چنتا دا وکھالا کر چکیا ہے، پچھلے دساں مہینیاں وچکار حکومت اسٹیٹ بینک توں پنج سوپنجاہ ارب روپئے توں ودھ قرضہ لے چکی ہے تے ایس نوں روکن لئی اسٹیٹ بینک نے حکومت نوں قنوناں وچ ترمیم کرن دی وی صلاح دتی ہے۔