امریکہ مہنگا پٹرول گڈیاں ساڈے چار ارب میل گھٹ چلیاں
وچار ڈیسک
June 19th, 2008
امریکہ دے فیڈرل ہائی ایڈمنسٹریشن (ایف ایچ اے)نے دسیا ہے جو اپریل وچ امریکہ دیاں سڑکاں تے دو ہزار تن توں مگروں گڈیاں ساڈھے چار ارب میل گھٹ چلیاں ہین۔ ایف ایچ اے دا کہنا ہے جو ایہہ اک اعشاریہ اٹھ فیصد دی گھاٹ ہے۔ پھیر وی امریکہ وچ دو سو چھتالی ارب میل گڈیاں چلیاں ہین۔
امریکہ وچ سن دو ہزار تن وچ گڈیاں تقریباً دو سو چالی ارب میل چلیاں سن۔ انی سو تراسی وچ ایہہ پینڈا صرف اک سو بتی ارب چلدیاں سن۔ پھیر ہر سال وادھا ہوندا گیا تے دو ہزار چار وچ دو سو پنجاہ ارب تیکر جا اُپڑیا۔ انج تے پچھلے دو تن سال توں گڈیاں دیاں کل میلاں وچ گھاٹا پیندا رہیا پر ایڈا وڈا گھاٹا پہلی واری ہویا ہے۔
جانکاراں دا کہنا ہے جو ایس دی مڈھلی وجہ پٹرول دی قیمت ہے۔ سن دو ہزار تن وچ اک ڈالر تے چوہتر سینٹ دا پٹرول وِکدا سی جیہڑا تن گنا ودھ کے چار ڈالر توں وی اتے جا اُپڑیا ہے۔
