حکومت نے ساریاں زرعی شیواں تے ڈیوٹی تے سیلز ٹیکس ختم کر دتا ہے جدوں کہ تیل،بجلی تے گیس تے سبسڈی چھیتی واپس لین نوں نندیاں ہوئیاں کہیا گیا ہے ایہہ سبسڈی مرحلے وار واپس لئی جاوے گی۔ حکومت نے ٹریکٹراں، زرعی دوائیاں بیہ تے فاسفیٹ کھاد سنے ساریاں زرعی شیواں تے درآمدی ڈیوٹی تے سیلز ٹیکس مکاون دا اعلان کیتا ہے۔
قومی اسمبلی نے 32 کھرب 90 ارب 61 کروڑ18 ہزار روپئے دے لازمی خرچیاں دی منظوری دتی ہے۔ اوہناں دا تعلق وزارت خارجہ، قومی اسمبلی، سینیٹ، ایوان صدر، سپریم کورٹ تے الیکشن کمیشن سنے بائی وفاقی اداریاں نال ہے۔ آئین موجب لازمی خرچیاں تے قومی اسمبلی وچ صرف بحث کیتی جاندی ہے قومی اسمبلی ولوں بلوچستان تے این ایف سی ایوارڈ وچ صوبیاں دا حصہ پنجاہ فیصد کرن دی سینیٹ دی چھیہتر سفارشاں دی حمیت کردی ہے۔
وفاقی وزیر خزانہ سید نوید قمر نے جمعرات دی شام قومی اسمبلی وچ نویں وفاقی بجٹ تے بحث نوں سمٹ دیاں ہوئیاں کہیا کہ زرعی پیداوار وچ وادھے تے کاشتکاراں نوں سوکھتاں دیون لئی حکومت نے ساریاں زرعی شیواں نوں ڈیوٹی فری کرن دا فیصلہ کیتا ہے۔ اوہناں نے کہیا وزیر اعظم دی ہدایت تے نکے زرعی قرض نادہندگان تے ہاؤس بلڈنگ کارپوریشن دے نکے فرض دہندگان دے خلاف کاروائی فوری طور تے روک دتی گئی ہے۔ ہن اوہناں دی زمین نیلام کر کے پیسے نہیں وصول کیتے جاون گے۔
اوہناں کہیا فصلاں دی انشورنس دا نظام بنایا جاوے گا۔ بینظیر انکم سپورٹ پروگرام ولوں تحفظات دور کرن لئی فیصلہ کیتا گیا ہے جو ایس پروگرام وچ کوئی سیاسی مداخلت نہیں ہووے گی۔ وزیر خزانہ سید نوید قمر نے کہیا بجلی تے تیل تے سبسڈی ہنے نہیں مکائی جارہی سگوں مرحلے وار اینی سبسڈی مکاون گے جنا لوکائی برداشت کر سکن۔
پٹرولیم مصنوعات آئیل مارکیٹنگ کمپنیاں، ڈیلرز دے منافعے گھٹ کرن تے ڈیمڈ ڈیوٹی مکاون تے غور کیتا جاوے گا۔ فنانس بل توں دس ایکٹ کڈ دتے جاون گے ایس وچ چھ تے فیصلہ ہو چکیا ہے رہندے تے غور جاری ہے۔ وزیر خزانہ نے کہیا نکے زرعی قرضیاں تے ہاؤس بلڈنگ کارپوریشن دے ڈیفالٹرز دیاں زمیناں نیلام کرن توں روک دتا گیا ہے فصلاں دی انشورنس لازمی آکھی جاوے گی بینظیر انکم سپورٹ فنڈ وچ کسے قسم دی مداخلت نہیں ہوون دتی جاوے گی اوہناں دا کہنا سی کہ موبائل فون دی درآمد دی حوصلے شکنی لئی ملک دے وچ موبائیل فون بناون دی صنعت لاون نوں ہلا شیری دتی جاوے گی۔ وزیر خزانہ نے کہیا ٹیکسٹائل دے شعبے لئی ریسرچ اینڈ ڈویلپمنٹ سپورٹس فنڈ دی سوکھت برقرار رکھی جاوے گی پر ایس لئی شعبیاں دی نشاندہی کیتی جاوے گی۔ افراط زر نوں جادو نال نہیں مکا سکدے بجٹ وچ انج دے شعبیاں تے ٹیکس لائے گئے ہین جنہاں دا تعلق امیراں نال ہے مسئلیاں نوں ایگزیکٹو آرڈر نال حل نہیں کرسکدے ایس لئی بوہت محنت کرنی پوے گی۔
قومی اسمبلی نے جمعرات نوں مالی سال دوہزار اٹھ نو لئی کئی وفاقی وزارتاں، ڈویژناں تے اوہناں دے ماتحت وفاقی اداریاں لئی اک سو ستائی منگاں دی زر دی کثرت رائے نال منظوری دے دتی۔ زبانی ووٹ راہیں حکمران اتحاد وچ رلتی جماعتاں دے رکناں نے زر دی منگاں دی حمیت کیتی جدوں کہ اپوزیشن رکناں نے مخالفت کیتی۔
اک مرحلے تے اپوزیشن نے جدوں زبانی ووٹ نوں چیلنج کیتا تے سپیکر نے گنتی کراون دا حکم دتا۔ گنتی وچ حزب اقتدار دے اک سو تئی تے اپوزیشن تے بتی رکن موجود سی۔ امور خارجہ، دفاع، خزانہ، تے اقتصادی امور، اطلاعات و نشریات ، ہاؤسنگ، تے تعمیرات کشمیر تے شمالی علاقہ جات دے امور، محنت تے افرادی قوت، بلدیات تے دیہی ترقی اقلیتی امور، انسداد، انسداد منشیات، سینیٹ، قومی اسمبلی، قومی ثقافت، شماریات، ماحول ،نجکاری، سرمایا کاری، بندرگاہواں تے جہاز رانی، ریلوے، مذہبی امور، سائنس تے ٹیکنالوجی، ریاستاں تے شمالی علاقے، خصوصی تعلیم، بہبود آبادی، سماجی بھلیائی، فاٹا، ٹیکسٹائل انڈسٹریز، سیاحت، ترقی خواتین، جواناں دے امور، مواصلات، انفارمیشن ٹیکنالوجی تے ٹیلی کام قنون تے انصاف پٹرولیم تے قدرتی وسیلیاں دیاں وزارتاں لئی زر دی منگاں دی منظوری دتی گئی۔
مجموعی طور تے اک سو نواسی مطالبات زر ہین، تے رہندے بونجاہ تے اج جمعے نوںبحث کیتی جاوے گی۔ اہناں دا تعلق اٹھ وزارتاں نال ہے۔ اٹھ وزارتاں دیاں منگاں تے زر تے اپوزیشن دی کٹوتی دیاں تحریکاں اج قومی اسمبلی وچ بحث وچ لیاندیاں جاون گئیاں۔
