کیہ بھارتی سرکار پردیساں وچ جمع بھارتیاں دا کالا دھن واپس لیاؤن لئی پہل کرے گی؟

بھاویں بھارت سرکار اجے اس بارے کجھ وی کردی نظر نہیں آؤندی پر جانکار حلقیاں موجب دیس دے سیاسی، افسرشاہی تے دھنوان حلقیاں وچ اس خبر نال ہڑکنپ مچیا ہویا ہے کہ جرمنی دی سرکار نے بھارت سرکار نوں اک چھوٹے جہے دیس لیچٹینسٹین دے اک وڈے بینک ایل جی ٹی وچ جمع بھارتی لوکاں جنہاں وچ اچیچے طور تے بھارت دے کئی وڈے سیاستدان، بے ایمان افسر تے ہور دو نمبر دا دھندا کرن والے وڈے امیر شامل ہن، دے جمع پیسے بارے جانکاری دین دی پیش کش کیتی ہے۔ حالاں کہ اج تک ایہہ سمجھیا جاندا رہیا ہے کہ بھارتیاں دا دو نمبر دا کالا دھن سوٹزرلینڈ وچ ہی جمع ہے پر جس طرح دیاں خبراں آ رہیاں ہن، اوہناں مطابق سوٹزرلینڈ توں وی ودھ پیسہ لیچٹینسٹین دے بینکاں وچ بھارتیاں دا پیا ہے۔

لیچٹینسٹین کیہ ہے؟
اسیں سمجھدے ہاں کہ بوہتے بھارتیاں نے کدے لیچٹینسٹین ناں دے دیس دا ناں وی نہیں سنیا ہووےگا۔ ایہہ اصل وچ ١٧١٩ وچ ہوند وچ آیا اک چھوٹا جیہا دیس ہے، جس دی دھرتی دا رقبہ صرف ١٦٠ مربعہ کلومیٹر ہے تے اوتھوں دی آبادی صرف ٣٤،٤٩٨ بندیاں دی ہے۔ اس دیس نوں نہ تاں کوئی سمندر لگدا ہے تے نا ہی اس دا کوئی آپنا ہوائی اڈا ہے۔ اس دے اک پاسے آسٹریا دی حد لگدی ہے جو صرف ٣٤.٩ کلومیٹر لمی ہے تے دوجے پاسے سوٹزرلینڈ ہے جس دی حد وی صرف ٤١.١ کلومیٹر ہے۔ ایتھے ٹیکس گھٹ ہون کارن دو نمبر دا پیسہ چٹا کرنا بہت آسان ہے۔ ایہہ دیس دنیا بھر دے تاناشاہاں، امیراں تے سیاستداناں دے کالے دھن نوں چٹا کرن والا مکہ سمجھیا جاندا ہے۔ امریکن خفیہ ایجنسی سی آئی اے دی فیکٹ بک موجب ٢٠٠٣ وچ اس دیس دا امریکہ نال منی لانڈرنگ (کالے دھن نوں چٹا کرن) دے خلاف سانجھی قنونی مدد بارے سمجھوتہ ہویا سی تے منی لانڈرنگ دے خلاف قانون وی بنیا سی۔

حالاں کہ جرمنی نے صرف ایل جی ٹی بینک وچ جمع بھارتیاں دے پیسے بارے جانکاری دین دی پیش کش ہی کیتی ہے۔ پر اوتھے ہور وی درجن توں ودھیرے وڈے بینک ہن جنہاں وچ لیچٹینسٹین لینڈ بینک، وروالٹنگز بینک، سینٹرم بینک، نیو بینک اتے قیصر رٹر بینک وغیرہ شامل ہن۔

سوٹزرلینڈ وچ کھرباں روپئے
لیچٹینسٹین دے بینکاں وچ بھارتیاں دے روپئے دی گل ساہمنے آؤن دا مطلب ایہہ ہرگز نہیں کہ بے ایمان سیاستداناں، افسراں تے کالے دھن دے سوامی امیر بھارتی لوکاں دے پیسے سوٹزرلینڈ دے بینکاں وچ نہیں پئے۔ سوٹزرلینڈ دی بینکنگ ایسوسی ایشن ولوں جاری انکڑیاں بارے ملیاں خبراں وی حیران کرن والیاں ہن کہ سوٹزرلینڈ دے بینکاں وچ سبھ توں ودھ پیسہ بھارتی لوکاں دا ہی جمع ہے۔ ایہہ نیڑے تیڑے ١٤٥٦ بلیئن ڈالر دسیا گیا ہے جو کہ بھارتی گنتی موجب ١.٤٥٦ کھرب امریکی ڈالر بندا ہے۔ جے اس نوں بھارتی روپیاں وچ بدل کے لکھیا جاوے تاں ایہہ ٥٩٠ کھرب روپئے توں ودھ دی رقم بندی ہے۔

روپئے باہر کویں جاندے ہن؟
سبھ توں اوکھا سوال ایہہ ہے کہ ایہہ ارباں کھرباں روپئے بھارت توں باہر بھیجے کویں جاندے ہن؟ تے اس دا سبھ توں سوکھا جواب ہے کہ حوالے راہیں۔ جدوں اس بارے وکھ وکھ سومیاں توں جانکاری اکٹھی کرن دی کوشش کیتی تاں حوالہ کسے مایاجال توں گھٹ ول ولیویں والا نہیں لگا۔ جس طرحاں دی جانکاری سانوں ملی ہے، اس موجب جس دیس وچوں کسے نے روپئے باہر بھیجنے ہندے ہن، اس نوں آپنے کسے واقف حوالہ کرن والے نال گل کرنی پیندی ہے تے اوہ روپئے لے کے اس دے بدلے وچ اس نوں کوئی نشانی دے دیندا ہے، جو اگے روپئے لین والے کول پہنچائی جاندی ہے، جس نوں روپئے لین والے دا سنگی دیس وچ بیٹھا ساتھی لے کے روپئے جاں عام طور تے اس دیس دی کرنسی جاں برابر دی رقم دے ڈالر وغیرہ دے دیندا ہے۔ اس طرحاں اصل وچ روپئے دیس وچوں باہر نہیں جاندے صرف کاغذی لین دین ہی ہندا ہے، جے جاندے وی ہن تاں ڈالر، یورو تے پونڈ۔ اک سائیٹ توں ملی جانکاری موجب حوالہ کرن والے عام طور تے نشانی دے طور متعلقہ دیس دی کرنسی دے نوٹ نوں ورتدے ہن۔

مثال دے طور اک لکھ توں ١٠ لکھ تک روپئے دے حوالے لئی ١٠ روپئے دا بھارتی نوٹ ورتیا جاندا ہے۔ پیسے لے کے نشانی دے طور ١٠ دا نوٹ ادھا پاڑ کے دے دتا جاندا ہے تے جتھے پیسے پہنچنے ہن، اس کول ایہہ ادھا نوٹ پہنچاؤن لئی کیہا جاندا ہے۔ پیسے پہنچاؤن والے کول نوٹ دا دوسرا ادھا ہندا ہے۔ اوہ پیسے دین ویلے آپنے کول موجود نوٹ دے ادھے حصے نوں پیسے لین والے بندے کول موجود نوٹ دے دوسرے ادھے حصے نال ملا کے تسلی کرکے پیسے دے دیندا ہے۔ دسیا جاندا ہے کہ جیکر روپئے ١٠ لکھ توں ٢٠ لکھ وچکار ہون تاں اس مقصد لئی ٢٠ روپئے دا نوٹ، ٥٠ لکھ تک ٥٠ روپئے تے کروڑ روپئے تک دے حوالے لئی ١٠٠ روپئے دا نوٹ ورتیا جاندا ہے۔

جائیداد دیاں قیمتاں دا اچھال
بھاویں پنجاب وچ کیپٹن امریندر سنگھ سرکار ویلے پنجاب وچ زمیناں تے جائیداد دیاں قیمتاں وچ آئے وڈے اچھال نوں اس ویلے دی کیپٹن سرکار دی اک کامیابی پاروں پرچاریا گیا سی پر کئی لوک اس وڈے اچھال پچھے وی سن ٢٠٠٣ وچ لیچٹینسٹین وچ بنے منی لانڈرنگ (کالے دھن نوں چٹا کرن) مخالف قانون اتے امریکہ نال اس بارے لیچٹینسٹین دے سانجھی قنونی مدد سمجھوتے نوں ویکھدے ہن۔ سمجھیا جاندا ہے کہ اس قانون دے بنن نال اس دیس وچ جمع کالے دھن دے سوامیاں نوں ڈر پے گیا سی کہ کتے اوہناں دے ناں ساہمنے نا آ جان تے اوہناں دی خون پسینہ وہا کے، جان، عزت تے پوزیشن خطرے وچ پا کے کیتی کالی کمائی ضبط نا ہو جاوے۔ اس لئی اوتھے بوہتا جمع دھن واپس لیا کے زمیناں جائیداداں دے سودیاں وچ کھپایا گیا، جس نال اکلے پنجاب وچ ہی نہیں سگوں پورے دیس وچ زمیناں تے جائیداداں دیاں قیمتاں وچ وڈا اچھال آیا۔

ہن دبئی تے ابوظہبی
جس طرحاں دیاں سرگوشیاں سنائی دے رہیاں ہن، اوہناں موجب اجکل دنیا بھر دے دو نمبر دے پیسے دے مالکاں دی پسندیدہ جگہ سوٹزرلینڈ جاں لیچٹینسٹین دے بینک نہیں رہے۔ بھارتی زمیناں جائیداداں دی بے نامی خرید وی گھاٹے دا سودا جاپ رہی ہے۔ اس لئی دو نمبر دے پیسے نوں کھپاؤن لئی اجکل سبھ توں پسندیدہ جگہ دبئی، ابوظہبی تے سعودی عرب نوں منیا جا رہیا ہے۔ جتھے ارباں روپئے دے مالک آپنی کالی کمائی وڈے وڈے ہاؤسنگ کمپلیکس، ہوٹل تے وپاری تھاواں خریدن تے خرچ رہے ہن کیونکہ اتھے ایہہ کالی کمائی صرف راکھویں ہی نہیں ہندی سگوں دن رات ودھدی وی ہے۔

وزیر اعظم جی دھیان دیو
بھارت دے وزیر اعظم ڈاکٹر من موہن سنگھ دی ایمان داری تے کسے نوں شک نہیں۔ پر ویلے کویلے مخالف آگو اوہناں نوں اک کمزور وزیر اعظم ثابت کرن دیاں کوششاں ضرور کردے رہندے ہن۔ جرمنی سرکار ولوں لیچٹینسٹین دے اک بینک وچ بھارتیاں دے روپئے بارے جانکاری دین دی پیش کش نوں ان گولیاں کرن بارے کھپ وی اوہناں دے عکس نوں کمزور کرن دا ہی کم کر رہی ہے۔