فیڈرل بورڈ آف ریونیو نے فنانس بل وچ ترمیماں دا مسودہ جمعے نوں وزارت خزانہ نوں گھل دتا ہے۔ چیئر مین ایف بی آر محمد عبداللہ یوسف نے ایہہ مسودہ فیڈرل بورڈ آف ریونیو دے ممبر سیلز ٹیکس تے وفاقی ایکسائز ڈیوٹی عبدالودود خان، ممبر کسٹم محمود عالم ممبر ڈائریکٹ ٹیکس عثمان خالد سرزم دی صلاح تے وزیر اعظم سید یوسف رضا گیلانی دی ہدایت دے چانن وچ تیار کیتا۔ پہلی جولائی دو ہزار اٹھ توں جنرل سیلز ٹیکس دی شرح پندراں فیصد توں سولاں فیصد کیتی جاوے گی۔ ایس اک فیصد نال قومی خزانے نوں چھبی ارب روپئے دی وادھو آمدن ہووے گی۔
امسال جنرل سیلز ٹیکس توں تن سو پچھتر روپئے آمدن دے تخمینے نال اگلے مالی سال لئی جنرل سیلز ٹیکس دا ہدف پونے پنج سو ارب دے نیڑے ہووے گا۔ فنانس بل جیس دی منظوری قومی اسمبلی منگل نوں دیوے گی منظوری دے ویلے پاکستان پیپلز پارٹی دا ساتھ دیون دا دو ٹوک اعلان پاکستان مسلم لیگ ن دے مرکزی لیڈر خواجہ محمد آصف نے رائے ونڈ وچ کولیشن حکومت دے آگواں محمد نوازشریف تے آصف علی زرداری دی ملنی توں مگروں جمعے نوں کر دتا ہے۔ ایس لئی فنانس بل دی منظوری وچ کوئی شبہ نہیں رہیا ۔ فنانس بل وچ ساریاں توں اہم ترمیم پراپرٹی مافیا کران وچ کامیاب ہو گئی ہے۔
پراپرٹی مافیا نے گیاراں جون دو ہزار اٹھ دے وفاقی بجٹ وچ وزیر خزانہ نوید قمر ولوں ہاؤسنگ سوسائٹیاں دے مالکاں پلاٹ ڈویلپ کر کے عام لوکاں نوں دیون والے ڈویلپرز تے فلیٹ پلازے مکان ہٹیاں بنا کے ویچن والے بلڈرز دی آمدن تے جیہڑی کیپیٹیل ویلیو ٹیکس لایا سی، ڈویلپرز، بلڈرز نے پارلیمنٹ دی کمیٹی دے رکناںراہیں فنانس بل وچ ایہہ ترمیم کروا دتی کہ ایہہ ٹیکس اوہناں کولوں نہیں لیا جاوے گا سگوں ایس ٹیکس دا سارا بھار پلاٹ، دکان، گھر دے خریدار نوں فیڈرل ایکسائز ڈیوٹی دی شکل وچ دتا جاوے گا۔ ایس ترمیم نوں فنانس بل وچ وزارت خزانہ نوں فیڈرل بورڈ آف ریونیو دے چیئر مین عبداللہ یوسف نے وزیر خزانہ نوید قمر دی منظوری نال گھلی ہے ایس موجب ریٹنگ ایریاز ادھے کر دتے جاون گے۔ ہن تیکر کراچی دی میونسپل حداں دے مکن چالی کلومیٹر لہور دی میونسپل حداں اگے دس کلومیٹر تیکر دا رقبہ ایس شہر دے ریٹنگ ایریا وچ گنیا جارہیا ہے پر نویں فنانس بل دی منظوری توں مگروں کرا چی، لہور ، فیصل آباد، تے رہندے نکے وڈے شہراں دا ریٹنگ ایریا ادھا کر دتا جاوے گا۔ ایس فیصلے تے پہلی جولائی دو ہزار اٹھ توں عملدرآمدشروع کر دتا جاوے گا۔
ایس ریٹنگ ایریا کیپیٹل ویلیو ٹیکس دی رجیم وچ رلتی سی تے ریٹنگ ایریاز دی زمین املاک دی خرید فروخت تے سی وی ٹی دی ادائیگی کرنی سی نویں ترمیم نال کیوں جو شہر دا ریٹنگ ایریاز ادھا کر دتا گیا ہے۔ ایس لئی ہن حکومت نوں گھٹ سی وی ٹی ملیا کرے گا کیوں جو پراپرٹی مافیا نے اپنے اثر رسوخ راہیں اپنے اُتے لگا ٹیکس خریدار تے ایف ای ڈی دی شکل وچ منتقل کر دتا ہے۔ ایس لئی ڈویلپرز، بلڈرز ہاؤسنگ سوسائٹی دے مالک بچ نکلے ہین تے خریداراں تے وادھو بھار پے جاوے گا۔ نویں ترمیم کیتے ہوئے فنانس بل دی منظوری نال پچھلی قومی اسمبلی دے منظور کیتے فنانس بل داریٹنگ ایریا گھٹ ہو جاوے گا۔
