طالبان نے پوست دے وپار وچ ارباں ڈالر کمائے:اقوام متحدہ
وچار ڈیسک
June 24th, 2008
اقوام متحدہ دی نشیاں نوں مکاؤن والی ایجنسی نے آکھیا ہے کہ ورھے دو ہزار ست وچ طالبان نے پوست دے وپار وچ اک سو ملین ڈالر کمائے نیں۔ ایجنسی دی موہری اینتونیو ماریا کوسٹا نے آکھیا کہ طالبان نے ایہہ پیسہ پوست دے کاشتکاراں دی کمائی تے دس فیصدی ٹیکس لا کے کمایا ہے۔
اینتونیو ماریا کوسٹا دا آکھنا ہے کہ طالبان دی کمائی ایس توں وی ودھ ہے کیوں جے اوہ پوست دے کاشتکار دی کمائی توں اڈ پوست دے وپار دے دو ہور مرحلیاں تے وی ٹیکس لیندے نیں۔ اوہناں آکھیا کہ طالبان پوست دیاں لیبارٹریاں دی راکھی تے پوست نوں سرحدوں پار اپڑاؤن دی ذمے واری لیندے نیں جیہدے لئی اوہناں وکھرا ٹیکس لایا ہویا ہے۔
افغانستان وچ ایس ورھے پوست دی کل پیداوار بارے پکے آنکڑے حالے ساہمنے نہیں آئے ہیں پر سوجھواناں دا وچار اے کہ ایس ورھے پوست دی پیداوار گھٹ ہوئی اے پر بوہتا فرق نہیں پیا۔ اقوام متحدہ دے بلارے موجب پچھلے ورھے افغانستان وچ اٹھ ہزار ٹن پوست کاشت کیتی گئی سی جیہدے وچوں چار ٹن نوں ورت لیا گیا تے رہندی چار ٹن حالے وی کسے تھاں لکائی ہوئی ہے۔ ایہہ پیداوار کاشتکاراں کول نہیں ہے سگوں کدھرے ہور تھاں تے لکائی ہوئی ہے۔
برطانوی پربندھیاں دا آکھنا ہے کہ طالبان پوست دی کمائی نال اپنیاں کھاڑکو کاروائیاں وچ ہتھ ونڈاؤندے ہین۔
