پاکستان وچ آٹے تے گھیو توں مگروں ہن کھنڈ دا اک وڈا بحران آؤن والا ہے کیوں جے پاکستانی کھنڈ ملاں نے پچھلے تن مہینیاں وچ 40 لکھ ٹن کھنڈ افغانستان تے دوجے ملکاں نوں ویچ دتی ہے۔ دس پئی ہے کہ روزیاں توں پہلوں پہلوں کھنڈ دا مُل 30 روپیئے توں ودھ کے 42 روپیئے کلو ہو جاوے گا۔
کھنڈ ملاں دے مالکاں دا آکھنا ہے کہ اوہناں نے کھنڈ باہر ایس لئی ویچی ہے کیوں جے ٹریڈنگ کارپوریشن آف پاکستان نے اوہناں کولوں لوڑیندی کھنڈ نہیں لئی۔ ایس ویلے کھنڈ ملاں دے کول ستاراں لکھ ٹن کھنڈ دا ذخیرہ ہے۔
وسیلیاں موجب ٹریڈنگ کارپوریشن آف پاکستان نے ست لکھ ٹن کھنڈ خریدنی سی تے ہن تیکر اوہنے چار لکھ بہتر ہزار ٹن کھنڈ خریدی ہے تے دو لکھ ٹن دے ٹینڈر دتے گئے ہین۔ پر ہن ایہہ ٹارگٹ پورا ہوون دی آس گھٹ گئی ہے کیوں جے کھنڈ ملاں نے کھنڈ باہرلے ملکاں نوں ویچ دتی ہے۔ کارپوریشن نے مئی تے جون وچ اک اک لکھ ٹن دے ٹینڈر دتے سن پر ہن تیکر اُکا چھیالی ہزار ٹن کھنڈ خرید سکی ہے۔
خوراک دی وزارت دا آکھنا ہے کہ جے کھنڈ دی تھوڑ ہو گئی تے سرکار نوں کھنڈ باہروں منگواؤنی پوے گی جیہدے نال کھنڈ دا مُل ودھ جاوے گا۔
