تیل دے مُل وچ وادھا رُکن دی کوئی آس نہیں:اوپیک پردھان
وچار ڈیسک
July 6th, 2008
تیل کڈھن والے وڈے ملکاں دی ستھ اوپیک دے پردھان چاکب خلیل نے خبردار کیتا ہے کہ ڈالر دے لگاتار ڈگن نال تیل دا مُل ودھدا رہوے گا۔ اوہناں آکھیا کہ آؤن والے ہفتیاں وچ تیل دا مُل ہور ودھ جاوے گا۔ سانوں ڈالر دی قدر نوں ویکھنا پینا ہے کیوں جو جے ڈالر اک فیصد ڈگدا ہے تے اوہدا مطلب ہے کہ تیل دا مُل چار ڈالر ودھ جاوے گا۔
اوہناں آکھیا کہ تیل کڈھن تے ویچن والے ملک ہوون پاروں ساڈا وچار ہے کہ تیل دی اجوکی رسد لوڑ موجب بتھیری ہے۔ تیل دی رسد وچ سودھ ساریاں دے فیدے وچ ہے تے ایہنوں بدلنا نہیں چاہیدا۔ تیل دا ودھدا مُل کسے دے فیدے وچ نہیں ہے۔
اوہناں نے تیل دے مُل تے سیاسی اثر بارے وی گل کیتی تے آکھیا کہ تیل دے مُل تے ایران تے لہندے وچکار چل رہے ایٹمی پروگرام دے جھیڑے دا وی اثر ہے۔ اوہناں ایس گل نوں رد کر دتا کہ تیل کڈھن والے ملک مُل نوں ہیٹھاں لیاؤن لئی تیل دی پیداوار وچ وادھے لئی راضی نہیں۔
اوہناں آکھیا کہ تیل دے مُل وچ وادھے دا 60 فیصد ڈالر دی قدر ڈگن تے سیاسی جھیڑیاں پاروں ہے۔ سارے اوپیک ملک تیل دی سپلائی ودھاؤن لئی راضی نیں پر ایران تے لیبیا دے مندے حالات پاروں کوئی وی اہناں ملکاں وچ سرمایہ لاؤن لئی راضی نہیں ہے۔
