بچت ودھاؤ تے باہرلے وسیلیاں ول گھٹ ویکھو: گورنر اسٹیٹ بینک
وچار ڈیسک
July 6th, 2008
گورنر اسٹیٹ بنک ڈاکٹر شمشاد اختر نے کہیا ہے مرکزی بینک نوں سب توں بوہتی چنتا حکومت ولوں لئے گئے قرضے' زرمبادلہ دے ذخیریاں وچ گھاٹ تے مقامی تے عالمی پدھر تے ہوون والی بدلیاں نال پیدا ہوون والیاں اوکڑاں توں ہے۔
اسٹیٹ بنک دے صدر دفتر وچ صدر پرویز مشرف دے دورے دے موقعے تے اقتصادی صورت حال تے کاروائی ولوں جانکاری دیندیاں ہوئیاں ڈاکٹر شمشاد اختر نے زور دتا جو خسارے نوں پورا کرن لئی مقامی بچتاں ودھائیاں جاون تے باہرلے وسیلیاں تے انحصار گھٹایا جاوے۔
چیتے رہوے جو صدر مشرف نے جمعے دی رات کراچی وچ تاجراں تے صنعت کاراں نال خطاب کردیاں ہوئیاں معیشت نوں بوہٹ وڈا وخت تے چیلنج آکھ دتا سی تے دسیا سی جو ملک توں سرمایہ باہر جا رہیا ہے تے ایہہ جو سانوں اپنی آمدن ودھاونی ہووے گی۔' عام بندے دی بولی وچ کہنا چاہواں گا ساریاں توں پہلے سانوں مالی خسارے دا مسئلہ پیش ہے۔ ساڈا وڈا مسئلہ ودھدے ہوئے خرچے ہین۔ جے ساڈے خرچے ودھے ہین تے سانوں آمدن وی ودھاونی پوے گی۔ ایہو ایہدا حل ہے ۔'
گورنر اسٹیٹ بینک نے زور دتا جو سرمایا کاراں دا اعتماد بحال کرن لئی کم کیتا جاوے تاں جو ملک وچ مقامی تے باہرلی سرمائے کاری ودھن تے فیدے مند اقتصادی پالیسیاں دا سلسلہ برقرار رکھیا جاوے۔
ڈاکٹر شمشاد نے کہیا ملک نوں بھاری تجارتی کرنٹ اکاؤنٹ تے بجٹ خسارے دا ساہمنا ہے، روپئے دے کھلار تے مہنگائی نال لوکائی دیاں اوکڑاں ودھیاں ہین۔ اوہناں نے صورت حال تے قابو پاون لئی کیتی گئی کاروائی توں وی صدر نوں خبردار کیتا۔
