بجلی ورتن والیاں نوں چاہیدا ہے کہ اگلے ورھے جون تیکر بجلی دا جھٹکا سہن لئی تیار ہو جاون۔ جون 2009ء وچ امیر لوک ای بلب بالن دی عیاشی کرن گے تے غریب 'کینڈل لائٹ ڈنر' دیاں موجاں مانن گے۔
جون 2009ء تیکر بجلی دا مُل گھٹ توں گھٹ وی 16-18 روپیئے یونٹ ہو جاوے گا۔ ایہدا مطلب ہے کہ اک سال دے وچ وچ بجلی دے مُل وچ 200 فیصدی وادھا۔ ایہدی وجہ ایہہ ہے کہ حکومت ہن بجلی تے دتی جاون والی چُھوٹ نوں مکاؤن دا سوچ رہی ہے۔
وسیلیاں راہیں پتہ لگا ہے کہ جون 2009ء تیکر وفاقی حکومت بجلی تے دتی جاون والی چُھوٹ (سبسڈی) نے مکا کے بجلی دے مُل وچ وادھا کر دیوے گی۔
سدھے لفظاں وچ ایہہ کہ بجلی نوں ڈومیسٹک، کمرشل تے انڈسٹریل طور تے ورتن والیاں لئی بجلی دا مُل اجوکے مُل 4-6 روپیئے یونٹ توں ودھ کے 16-18 روپیئے یونٹ ہو جاوے گا۔ ایس ویلے تیل دا مُل ودھ کے 45,000 روپیئے ٹن ہو گیا اے ۔ بجلی دا اک یونٹ بناؤن لئی 200 گرام تیل لگدا اے۔
تیل دے 200 گرام دا مُل کڈھیا جاوے تے اوہ 9 روپیئے بنندا اے جیہدے وچ تیل توں بجلی بناؤن دا خرچہ رلتی نہیں ہے۔ سرکاری بندیاں موجب تیل دے اجوکے مُل موجب بجلی دا اک یونٹ بناؤن دا خرچہ 15-16 روپیئے ہے پر حکومت بجلی دے بلاں وچ چھُوٹ دے رہی ہے۔
