پاکستان دی اوپن مارکیٹ وچ ڈالر دے مقابلے وچ پاکستانی روپئے دی قدر وچ مسلسل تن دناں توں کمی دے رحجان کارن ڈالر دی قیمت تہتر روپیے توں ٹپ گئی ہے جیہڑی ماہراں موجب تاریخ وچ پاکستانی روپئے دے مقابلے وچ ڈالر دی سب توں اُچی پدھر ہے۔ پچھلے دیہاڑ اوپن مارکیٹ وچ ڈالر بہتر روپئے وچ وکیا سی جدوں کہ اج مارکیٹ بند ہوون تیکر ڈالر دی قیمت 70,73 روپئے تیکر اپڑ گئی۔
ایس بارے اک پرائیویٹ منی ایکسچینج کمپنی دے اہلکار نبیل اقبال دا کہنا ہے جو اسیں مارکیٹ وچ ڈالر دی قیمت اینی ودھدی کدی نہیں ویکھی'۔ اوہناں دسیا پچھلے تقریباََ اک ہفتے توں ڈالر دے مقابلے وچ روپئے دی قدر ڈگ رہی ہے تے ہن ایہہ کمی تقریباََ دو توں تن فیصد تیکر رہی ہے جیہڑی بوہت ہی معمولی ہے۔
اوہناں موجب ڈالر دی قیمت وچ اچن چیتی وادھے دی مڈھلی وجہ ملک وچ ڈالر دی مانگ ودھنا ہے۔ پچھلے دوہواں ہفتیاں توں مارکیٹ وچ ڈالر دی بڑی ڈیمانڈ ہے تے کارپوریٹ کسٹمرز ہین اُچیچا آئل کمپنیز تے امپورٹر ایس ویلے مارکیٹ وچ بوہت خریداری کر رہے ہین۔ ایسے کارن انٹربینک مارکیٹ وچ بڑا پریشر ہے تے اوپن مارکیٹ وچ وی ڈالر دی قدر مسلسل ودھ رہی ہے۔'
نبیل اقبال موجب ڈالر دی قیمت ودھن نال مہنگائی ودھدی ہے ایس لئی عام لوکاں دی زندگی دے بھیڑے اثر پے سکدے ہین۔ ' اوہ کھان دیاں شیواں جیہڑیاں باہروں درآمد ہوندیاں ہین یاں جنہاں دا خام مال باہر توں آوندا ہے اوہناں دیاں قیمتاں تے فرق پیندا ہے تے اوہ ودھنا شروع ہو جاندیاں ہین، مثال دے طور تے تیل بجلی تے گیس وغیرہ۔
اوہناں دسیا روپئے دی قیمت نوں مستحکم رکھن لئی مارکیٹ وچ طلب دے حساب نال ڈالر دی رسد وچ وادھا کرن دی لوڑ ہے تے ایس لئی حکومت تے سٹیٹ بینک دا کردار بڑا اہم ہے۔' ایس ویلے سب توں ضروری گل ایہہ ہے جو سٹیٹ بنک مارکیٹ وچ ڈالر دی سپلائی تے توجہ دیوے، بوہتے توں بوہتا ڈالر مارکیٹ وچ لبھن تاں جو ایس منگ نوں پورا کیتا جا سکے'۔
فاریکس ایسوسی ایشن آف پاکستان دے صدر ملک بوستان دا کہنا ہے ڈالر دی قیمت ودھن دے مڈھلے کارن تجارتی عدم توازن، خام تیل دیاں قیمتاں وچ مسلسل وادھا، ملک دی غیر یقینی سیاسی صورتحال تے بمب دھماکے ہین جنہاں کارن ملک وچ غیر ملکی سرمایا کاری گھٹ گئی ہے۔
ملک بوستان نے روپئے دی ڈگ دی ہوئی ساکھ دا ذمے وار حکومت تے سٹیٹ بنک نوں کہیا تے صلاح دتی جو اہنوں سانبھن لئی سٹیٹ بینک نوں اگے آونا چاہی دا نہیں تاں ڈالر دی قیمت ودھن نال مہنگائی ودھے گی۔ ' حالی تے اہناں نوں ایہہ اینا محسوس نہیں ہورہیا پر میرے خیال وچ جدوں ڈالر اسی روپئے نوں کراس کرے گا تے مہنگائی دا انج دا طوفان آوے گا کہ لوک سڑکاں تے آوجان گے تے لوک بجائے کوئی ہور کاروبار کرن دے ڈالر خریدنا شروع کردیون گے جیویں اُنی سو اٹھانوے وچ ہویا سی۔'
اوہناں کہیا سٹیٹ بینک نوں روپئے نوں انج نہیں چھڈنا چاہی دا سگوں صورتحال نال نبڑن لئی منی ایکسچینجرز سنے ساریاں دھراں دا ہنگامی اجلاس سدنا چاہی دا۔'
ایس بارے سٹیٹ بنک دا موقف جانن لئی جدوں بینک دے ترجمان سید وسیم الدین نال رابطہ کیتا گیا تے اوہناں کہیا سی جو بینک دا کوئی وی اہلکار حالی ایس بارے کوئی گل نہیں کرسکدا۔
