دبئی پارٹی اجلاس وچ وزیر اعظم دی شرکت، خرانے نوں اک کروڑ دا نقصان

ڈی 8کانفرنس توں پرت دیاں وزیر اعظم یوسف رضا گیلانی دے طیارے دی کوالالمپور توں شیڈول موجب اسلام آباد آون دی بجائے اہنوں دوبئی کھڑن دی وجہ توں قومی خزانے نوں اک کروڑ روپئے دا وادھو نقصان جھلنا پیا۔ وزیر اعظم گیلانی تے اوہناں دا چالی رکنی وفد جیس وچ اک اپوزیشن کارکن تے پنج بزنس مین وی رلتی سن ست جولائی نوں ڈی ایٹ کانفرنس لئی گیا۔

پنجاہ توں ودھ سیکورٹی اہلکار تے بیوروکریٹس پہلوں ہی کوالالمپور لئی ٹر چکے سن۔وفد وچ رلتی کجھ رکناں موجب ایس وفد نوں واپس اسلام آباد آوناسی پر طیارے دا رخ عرب امارات ول موڑ دتا گیا جتھے وزیر اعظم گیلانی تے پیپلز پارٹی دے آگواں نوں پارٹی اجلاس وچ شرکت کرنا سی۔ پی آئی اے دے وسیلیاں موجب فلائٹ دی انج بدلی نال حکومت نوں ایوی ایشن، ایندھن تے کجھ ہور چارجز دی مد وچ سولاں لکھ روپئے خرچ کرنا پئے۔

ایس توں وکھ وسیلیاں موجب گرمیاں دے ٹریولنگ سیزن نوں ویکھدیاں ہوئیاں طیارے دے وادھو ورتن نال پنجاہ لکھ روپئے دا ہور خرچا چکنا پیا۔ وسیلیاں نے دی نیوز نوں دسیا جو دوبئی اپڑن دے مگروں کجھ بیوروکریٹس تے وفد دے رکناں نوں دنیا دے مہنگے '' گرینڈ حیات ہوٹل '' وچ رکھیا گیا۔ وفد دے دوجے بندیاں نوں اک ہور ہوٹل ' موون پک '' وچ رکھیا گیا۔سینٹرل ایگزیکٹو کمیٹی دے اجلاس وچ شرکت لئی وزیر اطلاعات شیری رحمان، وزیر پارلیمانی امور خورشید شاہ تے ہور امور کشمیر قمر الزمان کائرہ سدھے پاکستان توں دوبئی اپڑے۔ وسیلیاں موجب '' گرینڈ حیات ہوٹل'' وچ چالی کمرے بک کروائے گئے جیہڑے کہ دوجے ہوٹل وچ ریزرو کروائے گئے کمریاں توں وکھ سن۔ وفد دے اوہ رکن جنہاں نوں پیپلز پارٹی دے اجلاس وچ شرکت نہیں کرنا سی اوہ اپنے کمریاں تیکر ہی رہے کیوں جو دوبئی دا دورہ شیڈول وچ شامل نہیں سی۔