ملک دیاں تنوں سٹاک ایکسچینجاں ڈُب گئیاں، سرمایہ کاراں دی توڑ بھن
وچار ڈیسک
July 17th, 2008
ملک دیاں تنوں سٹاک ایکسچینجاں وچ اج سرمایہ کاراں دا صبر جواب دے گیا تے سویر توں ای ہوون والی توڑ بھن، پتھرا اتے احتجاج توں مگروں مارکیٹ فیر گھاٹے وچ بند ہوئی۔ پندراں دیہاڑیاں وچ کراچی سٹاک ایکسچینج دا اعشاریہ ہن تیکر پنج ہزار چھ سو پوائنٹ ڈگ چکیا ہے جیہڑا چھتی فیصد دے نیڑے بنندا ہے۔
کراچی سٹاک ایکسچینج دا سو دا اعشاریہ سارا دن ڈاڈھی تھلڑی پدھر تے رہن مگروں کجھ چنگا ہو کے دس ہزار دو سو تیراں تے بند ہویا۔ انج اعشاریئے دے اخیر تے دو سو اُناسی پوائنٹ دی گھاٹ ہوئی۔
سینکڑے سرمایہ کاراں نے ٹریڈنگ ہال دے باہر اکٹھے ہو کے نعرے بازی کیتی تے شیئراں دے ڈگدے ہوئے مُل پاروں مارکیٹ دو دیہاڑیاں لئی بند کرن دی منگ کیتی۔
توڑ بھن تے خرود وچ دو بندے پھٹڑ ہوئے تے حالات نوں ویکھدیاں مارکیٹ وچ پولیس نوں سد لیا گیا۔ سرمایہ کاراں نے کاروبار نوں سہارا دیون لئی مارکیٹ سپورٹ فنڈ چھیتی توں چھیتی لیاؤن دی منگ کیتی۔
لہور وچ وی سٹاک ایکسچینج دے باہر سرمایہ کاراں نے مارکیٹ وچ چل رہی مندی تے بھرواں احتجاج کردیاں ٹائر ساڑے تے سڑکاں تے ڈکے لا دتے۔ اسلام آباد سٹاک ایکسچینج وچ وی نکے سرمایہ کاراں ولوں احتجاج کیتا گیا۔
ایس ای سی پی دے چیئرمین رضی الرحمان دا آکھنا ہے کہ کراچی سٹاک مارکیٹ وچ توڑ بھن تے سرمایہ کاراں دے احتجاج مگروں کراچی سٹاک ایکسچینج نوں کجھ دیہاڑیاں لئی بند کرن بارے گوہ کیتا جا رہیا ہے۔
