حکومت نے مالی سال دو ہزار اٹھ اتے نو لئی نویں وپاری پالیسی دا اعلان کردیاں ہندوستان توں تیل اتے ڈیزل سنے کئی وستاں منگواؤن دی اجازت دیون دا اعلان کیتا ہے۔ ایس گل دا اعلان وپار دے وفاقی وزیر احمد مختار نے وفاقی کابینہ دی منظوری توں مگروں کیتا ہے۔
اوہناں دسیا کہ ہن ہندوستان توں سٹین لیس سٹیل، سُوتی دھاگہ، کتاباں، معدنیات نال جُڑی مشینری تے سند اتے سی این جی بساں وی منگوائیاں جا سکن گیاں۔
اوہناں دسیا کہ حکومت بھارت نال وپار ودھاؤنا چاہوندی ہے تے کئی وستاں جیہناں تے ہندوستان توں منگواؤن تے پابندی ہے اوہنوں مکاؤن دا فیصلہ کیتا گیا ہے تے اوہناں وستاں دی لسٹ چھیتی ای جاری کر دتی جاوے گی۔
وپار دے وزیر نے دسیا کہ اچیچے کھیتراں وچ صنعتی یونٹ لاؤن لئی جیہڑی مشینری باہروں منگوائی جاوے گی اوہدے تے ٹیکس وچ چُھوٹ دتی جاوے گی۔ سونے، چاندی، ہیرے، پلوٹونیم اتے دوجیاں ہور دھاتاں اتے وڈ مُلے پتھر باہروں منگواؤن تے وی سیلز ٹیکس اتے کسٹم ڈیوٹی وچ چُھوٹ ہووے گی۔
اوہناں دسیا کہ حکومت نے افغانستان نال وپار کرن لئی وی اوہدے دو صوبیاں پکتیکا اتے خوست دے نیڑے سرحد تے کسٹم چوکیاں بنائیاں جاون گیاں۔
اوہناں دسیا کہ پاکستان وچ باہروں منگوائیاں جاون والیاں ادھیاں وستاں دنیا دے ست ملکاں امریکہ، برطانیہ، جرمنی، ہانگ کانگ، دبئی اتے سعودی عرب توں منگوائیاں جاندیاں ہین۔ اوہناں دسیا کہ نویں پالیسی موجب نویاں منڈیاں لبھیاں جاون گیاں۔ احمد مختار نے دسیا کہ دنیا وی پنج ہزار توں ودھ وستاں دا ملکاں وچکار کاروبار ہوندا ہے جدوں کہ پاکستان وچ ساڈھے تیراں سو دے نیڑے وستاں منگوائیاں جاندیاں ہین۔ اوہناں آکھیا کہ عوامی حکومت چاہندی ہے کہ باہروں منگوائیاں جاون والیاں وستاں وچ وادھا کیتا جاوے۔
وپار دے وزیر نے دسیا کہ پہلوں تن ورھے پرانیاں بساں باہروں منگوائیاں جا سکدیا سن پر ہن حکومت تے دس ورھے پرانیاں بساں وی باہروں منگواؤن دی اجازت دے دتی ہے۔ اوہناں دسیا کہ نویں وپاری پالیسی موجب دوائیاں اتے کیمیکل کمپنیاں لئی وی چُھوٹاں دتیاں گئیاں ہین۔
