زمبابوے دے سینٹرل بینک نے دسیا ہے کہ بینک ملک وچ سخراں تے اپڑی مہنگائی نال نبڑن لئی 100 بلین ڈالر دا نوٹ چھاپ رہیا ہے۔
زمبابوے وچ معیشت دی بربادی مگروں گوشت، مکئی، تیل تے حیاتی لئی لوڑیندیاں دوجیاں کئی وستاں دا کال پیا ہویا ہے۔
سینٹرل بینک دے گورنر گڈیون گونو نے بدھ دے دیہاڑے دسیا سی کہ پیسے دا کھلار 2.2 ملین فیصد ودھ گیا ہے جدوں کہ کجھ معاشی سوجھواناں دا آکھنا ہے کہ حالات ایس توں وی مندے ہین۔
ہیرالڈ اخبار وچ چھپن والے اک نوٹس وچ گونو نے آکھیا ہے کہ زمبابوے دا ریزرو بینک 100 بلین ڈالر دا نوٹ چھاپے گا تاں جو اوہناں لوکاں دا بھلا ہو سکے جیہناں نوں کوئی نکی موٹی شئے خریدن لئی وی نوٹاں دے بورے لے کے جانے پیندے ہین۔ نوٹس وچ دسیا گیا ہے کہ نواں 100 بلین ڈالر دا نوٹ سوموار دے دیہاڑے لوکاں کول اپڑ جاوے گا۔
