پیٹرول اتے ایہدے نال بنن والیاں وستاں وچ اجوکے وادھے توں مگروں 31 دسمبر تیکر پیٹرول توں ساری چھوٹ مکاؤن لئی سرکار نوں ایہدے مل وچ 50 فیصد ہور وادھا کرنا پوے گا۔
مٹی دے تیل دے مُل وچ 58.12 فیصد وادھے دی لوڑ اے جیہدے نال ایہدا مُل 92 روپیئے 30 پیسے ہو جاوے گا۔ ڈیزل دے مُل وچ 52.03 فیصد وادھے دی لوڑ ہے جیہدے نال ایہدا مُل چھیاسی روپیئے چھیالی پیسے ہو جاوے گا تے ہائی سپیڈ ڈیزل دے مُل وچ 54.79 فیصد ہور وادھا ہووے گا جیہدے مگروں ایہدا مل سو روپیئہ ہو جاوے گا۔
سرکار نے بجٹ بنایا ہے کہ ایس ورھے تیل 110 ڈالر فی بیرل تے امپورٹ کیتا جاوے گا جدوں کہ عالمی منڈی وچ تیل دا مُل فی بیرل 130 ڈالر دے نیڑے ہے جیہدے پاروں 20 ڈالر دا فرق پئے رہیا اے۔ پاکستان تیل عرب ملکاں کولوں لیندا ہے جیہڑا دس ڈالر سستا پیندا اے ایس طرحاں ایہہ فرق دس ڈالر دا رہ جاندا اے۔
سوموار دے دیہاڑے سرکاری پربندھیاں نے میڈیا نوں دسیا سی کہ جے عالمی منڈی وچ تیل دا مُل اجوکی پدھر تے وی رہندا اے تے فیر وی سرکار نوں تیل دے مُل وچ ہوون والے وادھے دا سارا اثر لوکائی تیکر اپرانا پوے گا۔
