ایس حکومت نے پٹرول تے مٹی دے تیل تے لگے سیل ٹیکس، مارکیٹنگ کمپنیاں تے ڈیلرز دے منافعے تے اوہدی ترسیل دے خرچیاں وچ ویہہ توں ستر فیصد ودھا کے عام ورتن والیاں نوں اہناں شیواں تے اک لٹر لئی پنج توں تیراں روپیے وادھو بھرن تے مجبور کر دتا ہے۔
سرکاری حساب کتاب موجب عالمی مارکیٹ وچ تیل دیاں ودھدیاں قیمتاں دے نال نال پاکستان وچ تیل دی درآمد، اوہدی صفائی تے ترسیل دے ناں تے کمائے جاون والے نفعے وچ وی حکومتی دعویاں دے الٹ مسلسل وادھے دا کم جاری ہے۔
ایس سال فروری دی اٹھاراں تاریخ نوں جیس دیہاڑ پاکستانیاں نے نویں حکومت چنی، ملک وچ پٹرول تے جنرل سیلز ٹیکس دی مقدار ست روپئے سی جدوں کہ اج باراں روپئے فی لٹر ہر پاکستانی پٹرول تے سیلز ٹیکس ادا کررہیا ہے۔ انج وزیر اعظم دے اعلان موجب مٹی دے تیل تے لگے سیلز ٹیکس نوں ہن دی حکومت نے ساڈھے چار روپئے توں ودھا کے اٹھ روپئے کر دتا ہے۔
تیل تے گیس دے ریگولیٹری ادارے اوگرا توں لئے سرکاری حساب موجب اہناں پنجاں مہینیاں وچکار تیل ویچن والی غیر ملکی کمپنیاں تے اوہناں دے مقامی ڈیلراں دے منافعے وچ پنجاہ فیصد توں بوہتا وادھا کیتا گیا ہے جدوں کہ پٹرولیم شیواں دیاں قیمتاں سارے ملک وچ اک ہی پدھر تے رکھن لئی ٹرانسپورٹراں نوں دتے جاون والے نفعے وچ کیتا گیا وادھا گھٹو گھٹ سو فیصد ہے۔
پر حکومت نے پٹرولیم ڈیویلپمنٹ چارجز نوں مکایا ہے جیہڑا فی لٹر پنجاہ پیسے ہوندا سی۔ایتھے ایہہ گل وی دسن والی ہے جو نگران حکومت نے پٹرولیم ڈیولپمنٹ لیوی دے ناں تے خالص سرکاری نفعے نوں ساڈھے ست روپئے توں گھٹا کے پنجاہ پیسے کیتا سی۔
اہدے مقابلے وچ پٹرول دی قیمت وچ ریفائینری توں لے کے ورتن والیاں تیکر اپڑن دے خرچیاں نوں تقریبا دوگنا کر دتا گیا ہے۔ اٹھاراں فروری نوں ریفائنری توں حاصل ہوون والے ورتن دے قابل پٹرول دی قیمت چوتالی روپئے سی جدوں کہ سارے منافعیاں تے خرچیاں تے ٹیکساں توں مگروں ورتن والیاں لئی ایہہ پٹرول ترونجاہ روپئے وچ سی پر ریفائنری توں ورتن والیاں تیکر اپڑن وچکار پٹرول دی قیمت وچ نو روپئے وادھا ہویا سی۔ اج تیل ریفائنری توں ایہہ پٹرول انہتر روپئے وچ ملدا ہے جدوں کہ پٹرول پمپ تے ایہہ چھیاسی روپئے وچ ملدا ہے۔ ریفائنری تے پمپ دی قیمت وچ ایہہ فرق ہن ستاراں روپیاں تیکر اپڑ گیا ہے۔
کساناں دے ٹیوب ویلاں وچ ورتن والے لائیٹ ڈیزل آئیل تے لگے سیلز ٹیکس وچ اسی فیصد تے اوہنوں دیاں ویچن والیاں مارکیٹنگ کمپنیاں دے نفعے وچ ڈیڈھ سو فیصد وادھا کر کے اوہدے تے لگے کل خرچیاں وچ اسی فیصد وادھا کر دتا گیا ہے۔
گڈیاں وچ ایندھن دے طور تے بلن والے ڈیزل دا معاملہ ہور ہے۔ شوکت عزیز دی حکومت نے ڈی ریگولیشن تے فری مارکیٹ اکانومی دی پلیسی دے تحت پٹرولیم شیواں دی درآمد، قیمتاں نوں متھن تے ترسیل دے معاملیاں توں حکومت نوں وکھ کرن دا سلسلہ شروع کیتا سی تے ڈیزل نوں ایس فہرست وچ پہلے نمبر تے رکھیا گیا سی۔
ایس لئی ڈیزل دی قیمت نوں متھنا ہن خالص مارکیٹ دے اتار چڑھا دے ہیٹھ ہے۔ ایسے کارن ایس دے ریٹ وچ اینا ردوبدل ہے جو حکومت نوں اہنوں ورتن والیاں دی اپڑ وچ رکھن لئی تریہہ روپئے تیکر سبسڈی دینی پیندی ہے۔
ماہر کہندے ہین جو ریفائنری توں حاصل ہوون والے ڈیزل تے تیل دی قیمت نوں وی گھٹاونا چاہی دا۔ لمے چر توں پٹرولیم صنعت وچ وڈے عہدیاں تے کم کرن والے سینیٹر دلاور عباس کہندے ہین پٹرول تے ڈیزل دی صفائی تے ہوون والے خرچے اینے نہیں جنا آئل ریفائنریز ظاہر کردیاں ہین۔
انج ڈیزل دی صفائی دا معیار دی اوہدے خرچیاں موجب نہیں ایس لئی حکومت آئیل ریفائنری دے نفعے نوں واہوا گھٹا سکدی ہے۔ سینیٹ کمیٹی برائے پٹرولیم مصنوعات دے پردھان دلاور عباس نے بی بی نال گل کردیاں ہوئیاں کہیا جو اوہناں دی کمیٹی نے ایس بجٹ وچکار حکومت کولون سفارش کروائی سی جو پٹرولیم شیواں تے لگے سیلز ٹیکس وچ واہوا کمی کیتی جاوے۔
اسیں حکومت نوں ایہہ وی کہیا سی جو مارکیٹنگ کمپنیاں تے ڈیلرز دے نفعے وچ وی کمی ہوسکدی ہے پر حکومت نے ایس کمی دی بجائے اوہناں غیر ملکی کمپنیاں دے نفعے نوں ودھا دتا ہے۔'
اوہناں کہیا مارکیٹنگ کمپنیز نوں ایہہ وادھو نفع چار سال پہلوں دینا شروع کیتا گیا سی تے اوہناں نوں کہیا گیا سی جو اوہ ملک لئی تیل دے وادھو ذخیرے بناون۔ ایہہ پروجیکٹ ہن پورا پو گیا ہے تے ایس نفعے تے نظر ثانی دی لوڑ ہے پر حکومت اپنی سستی تے نا اہلی دی وجہ توں ایس بارے کوئی پالیسی نہیں بنا رہی۔'
