تیل ویچن والیاں کمپنیاں نے سرمایہ کاری روکن دی تڑی لا دتی
وچار ڈیسک
July 26th, 2008
پاکستان وچ تیل دی مارکیٹنگ کرن والیاں کمپنیاں نے حکومت نوں تڑی لائی ہے کہ جے پیٹرول دیاں وستاں تے منافع بوہتا لین تے لگی پابندی نوں نہ ہٹایا گیا تے اوہ ایس شعبے وچ سرمایہ لاؤنا چھڈ دیون گیاں۔
اطلاعواں موجب سرکار نے تیل ورتن والیاں تے عالمی منڈی وی تیل دے ودھدے مُل دا اثر روکن لئی تیل مارکیٹنگ کرن والیاں کمپنیاں دے منافعے وچ وادھا تے ڈیلراں دا کمیشن یکم جولائی نوں جتھے سی اوتھے ای روک دتا سی۔ ایس ورھے فروری وچ عالمی منڈی وچ تیل دا مُل ودھن مگروں ڈیلراں دا کمیشن اتے کمپنیاں دا منافع 40 توں 50 فیصدی ہو گیا سی۔
تیل مارکیٹنگ کمپنیاں نے سرکار نوں اک چٹھی لکھی ہے جیہدے وچ سرکار ولوں منافع ودھن تے لائی جاون والی روک تے چنتا دا وکھالا کیتا ہے۔ اک غیر ملکی تیل کمپنی دا آکھنا ہے کہ منافعے تے روک لگن مگروں اوہ اگانہہ توں ہور سرمایہ لاؤن بارے گوہ کرے گی۔ کمپنی دا آکھنا ہے کہ سرکار اتے تیل کمپنیاں دے نمائندیاں وچکار منافعے دی شرح تے گل بات ہوئی سی جیہدے سُجھا اقتصادی رابطہ کمیٹی دے اکٹھ وچ پیش کیتے جانے سن پر کمیٹی دی منظوری دے بنا ای ایس تے عمل روک دتا گیا۔
اک ہور غیر ملکی تیل کمپنی نے وی ایس فیصلے تے احتجاج کیتا ہے۔ اوہدا آکھنا ہے کہ ایس فیصلے تے مُڑ جھات پائی جاوے نہیں تے ستمبر توں مگروں تیل دی سپلائی روک دتی جاوے گی۔
