باہرلے سرمایہ کاراں نے پاکستانی منڈیاں وچوں 30 ملین ڈالر ہور کڈھ لئے
وچار ڈیسک
July 27th, 2008
ملک دے مندے سیاسی تے معاشی حالات پاروں باہرلے ملکاں دے سرمایہ کار اپنا پیسہ پاکستانی منڈیاں وچوں کڈھی جا رہے ہین۔ 25 جولائی 2008ء نوں مُکن والے ہفتے وچ سرمایہ کاراں نے ہور 29.593 ملین ڈالر دا سرمایہ منڈی وچوں کڈھ لیا۔
نیشنل کلیئرنگ کمپنی پاکستان ولوں جاری کیتے گئے آنکڑیاں موجب 5.897 ملین ڈالر منگل دے دیہاڑے کڈھیا گیا، بُڈھ نوں 9.902 ملین ڈالر، جمعرات نوں 2.990 ملین ڈالر اتے جمعے دے دیہاڑے 11.207 ملین ڈالر دا سرمایہ منڈی وچوں کڈھ لیا گیا۔
ملک دی وگڑدی ہوئی سیاسی صورتحال اتے ڈگدے ہوئے معاشی اعشاریئے سرمایہ کاراں نوں اپنا سرمایہ منڈیاں وچوں کڈھن تے مجبور کر رہے ہین۔ سیکیورٹی اینڈ ایکسچینج کمیشن اتے کراچی سٹاک ایکسچینج ولوں منڈی نوں سہارا دیون لئی کیتے جان والے پربندھ وی ناکام ہو گئے ہین تے سرمایہ کاراں نوں پاکستانی منڈی تے بھروسہ نہیں رہ گیا۔
