معاشی مسئلیاں دی لہر نے لکھاں خانداناں نوں غربت دی لیک توں تھلے دھک دتا ہے جیس نال صرف پاڑ دا شکار مخلوط حکومت نوں ہی نویں چیلنج دا ساہمنا نہیںہے سگوں انتہاپسندی دا خطرہ وی ودھ رہیا ہے۔ تیل تے خوراک دیاں اسمان نال گلاں کردیاں قیمتاں، چھ چھ گھنٹے لوڈ شیڈنگ تھلے ڈگ دی سٹاک مارکیٹ تے ودھدا ہویا روپئے دا کھلار اہناں سارے کارناں نے ایٹمی طاقت رکھن والی سولاں کروڑ لوکائی نوں غصے تے چنتا دی حالت وچ پا دتا ہے۔
اسلام آباد دے نیڑے اک پنڈ وچ اک کمرے دے گھر وچ وسنیک فخرزمان دا کہنا سی اسیں ناشتے وچ چاء دے نال روٹی کھانے ہاں تے دوپہر دا کھانا کھان دی ہمت نہیں رکھدے۔ سرکاری محکمے وچ سٹینو گرافر فخرالزمان دی تنخواہ ست ہزار ہے تے معاشی لحاظ نال اوہناں دی گنتی پاکستان دے مڈل کلاس طبقے وچ ہوندی سی پر ایس ویلے اوہ اپنے دو نکیاں نیانیاں لئی پھل وی نہیں خرید سکدا۔ نیانے کئی وار بھکھے رہندے ہین تے اوہناں نوں گلے سڑے پھل کھوان تے مجبور ہین۔ ججاں دی بحالی تے مفلوج تے طالبان دے نال مذاکرات تے غیر ملکی دبا دا شکار حکومت دے استحکام لئی ہن معاشی مسئلہ سب توں وڈا خطر بن کے ابھر رہیا ہے۔ معاشی مسئلیاں تے لوکائی دے غصے دا اک وکھالا اُس ویلے ساہمنے آیا جدوں کراچی وچ تاجراں نے سٹاک ایکسچینج دی عمارت وچ توڑ بھن کیتی۔
لہور وچ رعایتی قیمتاں تے کنک خرید دے اک بندے نے غصے وچ کہیا ایہہ لوک افغانستان نوں کنک گھل رہے ہین پر ساڈے اپنے کھان لئی کجھ نہیں ہے۔ تیل دیاں قیمتاں دا مسئلہ سارے مسئلیاں تے چھایا ہویا ہے۔ کار وچ گیس بھروان لئی سٹھ کاراں دی لمی لین وچ لگے ٹیکسی ڈرائیور ناصر محمود دا کہنا سی پاکستان گیس آپوں پیدا کردا ہے پر حکومت دا ایس تے کوئی کنٹرول نہیں ہے۔ مبصراں دا خیال ہے معاشی مسئلیاں دے کارن لوکائی وچ چنتا پیدا ہوون دا ڈر ہے۔ تجزیہ کار طلعت محمود کہندے ہین معاشی بحران ، افراط زر تے لوڑ دیاں شیواں دیاں ودھدیاں ہوئیاں قیمتاں شدت پسندی نالوں ودھ لوکائی نوں متاثر کر رہی ہے۔ انٹرنیشنل کرائسس گروپ دی ثمینہ احمد کہندیاں ہین امریکہ ولوں پاکستان دی امداد وچ وادھا اک ہلا شیری دیون دا اشارہ ہے جو امریکہ صورتحال سمجھ رہیا ہے پر جتھے بے روزگاری ہے تے سیاسی حق نہیں ہین اوتھے جنگجو لوکاں دے ہتھ وچ بندوقاں پھڑا سکدے ہین۔
