اج بینکاں وچکار ڈالر دے مقابلے وچ روپیئے دی قدر اک روپیہ 25 پیسے گھٹ گئی جیہدے مگروں ڈالر 75 روپیئے توں وی ٹپ گیا ہے۔ کرنسی دے وپاریاں موجب پچھلے دیہاڑے بینکاں وچکار ڈالر دے مقابلے وچ روپیہ 73 روپیئے 75 پیسے تے بند ہویا سی تے اج ایہہ 75 روپیئے دی حد وی ٹپ گیا ہے۔ کھلی منڈی وچ ڈالر 75 روپیئے تے 50 پیسے وچ وک رہیا ہے۔
انویسٹ کیپیٹل دے تجزیہ کار خرم شہزاد موجب منڈی وچ ڈالر دے خریدار بوہتے ہوون پاروں ادارے تے سرمایہ کار ڈالر لین وچ موہ رکھدے نیں جدوں کہ منڈی وچ سٹہ وی کھیڈیا جا رہیا ہے۔ اوہناں دا آکھنا ہے کہ ملک وچ مندے سیاسی حالاں پاروں سٹے بازاں کم وکھاؤنا شروع کر دتا ہے جیہڑے درآمدکاراں لئی اوکڑاں کھڑیاں کر رہے نیں۔
سوجھواناں دا آکھنا ہے کہ اہناں حالات وچ اسٹیٹ بینک ولوں روپیئے دی قدر نوں سانبھن لئی پیر پُٹن دی لوڑ ہے۔
