پردیسی پاکستانیاں نے جولائی وچ پیسے گھلن دا ریکارڈ قائم کر دتا

ایس مالی سال دے پہلے مہینے یعنی جولائی وچ باہرلے ملک وسنیک پاکستانیاں نے ریکارڈ 62 کروڑ 70 لکھ ڈالر دیاں رقماں وطن گھلیاں۔ ایہہ ملکی تاریخ وچ کسے اک مہینے وچ سب توں ودھ ملن والیاں ترسیلاں ہین۔ ساریاں اوکڑاں تے مسئلیاں دے مگروں تریہ جون نوں مکن والے مالی سال دے وچکار باہرلے ملک پاکستانیاں ولوں گھلیاں گئیاں رقماں واہوا ودھیاں سن تے گھٹو گھٹ چھ ارب ڈالر ترسیلاں پاکستان نوں ملیاں ہوئیاں۔

اقتصادی اوکڑاں دے شکار ملک لئی ایہہ رقم اک وڈی مدد دے طور تے ویکھی جاندی رہی ہے جیس نے باہرلیاں ادائیگیاں وچ اہم کردار ادا کیتا۔ ملک دا سیاسی منظرنامہ تے ہے ہی چنتا دا کارن پر اقتصادی اوکڑاں وی گھٹ نہیں۔

تجزیہ کار عام طور تے معاشی عدم استحکام دی وڈی وجہ سیاسی بے یقینی نوں وی کہندے ہین۔ پر کجھ تجزیہ کاراں دا خیال ہے جو معیشت نوں پیش اوکڑاں صرف پاکستان وچ ہی نہیں سگوں دنیا دیاں ہور معیشتاں نوں وی ایسے صورتحال دا ساہمنا ہے۔

تیل دیاں عالمی قیمتاں وچ پچھلے اک ورہے وچکار ہوون والے وڈے وادھے، جنساں دی پیداوار وچ کمی نال قیمتاں وچ وادھا تے اوہدے نتیجے وچ روپئے دے کھلار دی بوہتی شرح ملکاں دا وـڈا مسئلہ رہیا ہے تے ایہہ کہ پاکستان اوہدے وچ کلا نہیں۔

تجزیہ کاراں دا خیال ہے جو باہرلے ملک وسنیک پاکستانیاں ولوں قنونی وسیلیاں توں رقماں گھلیاں جارہیاں ہین سگوں اوہناں وچ ہوون والا وادھا بڑی اہمیت رکھدا ہے۔

امریکہ برطانیہ، سعودی عرب، مشرقِ وسطیٰ سنے سارے ہی ملکاں توں گھلیاں جاون والیاں رقماں ودھیاں ہین۔