صدر دا استعفیٰ: مارکیٹاں چڑھ گئیاں، روپیئے دی قدر وچ وادھا
وچار ڈیسک
August 18th, 2008
صدر دے استعفے دیاں خبراں تے اج کراچی سٹاک مارکیٹ وچ تیزی ویکھی گئی تے روپیئے دی قدر وچ اک روپیہ 20 پیسے دا وادھا ہویا جیہدے نتیجے وچ ڈالر دی قیمت فرخت گھٹ کے 75 روپیئے 40 پیسے ہو گئی۔
کراچی سٹاک ایکسچینج وچ سویر توں ای صدر دے استعفے دیاں خبراں تے تیزی رہی تے انڈیکس 700 پوائنٹ دی پدھر ٹپ گیا۔ جولائی وچ مارکیٹ ایس پدھر تے ویکھی گئی سی۔ اج انڈیکس وچ ساڈھے چار سو پوائنٹ دا وادھا ویکھیا گیا۔ ایکسچینج دے ممبراں اتے وپاریاں نے مشرف دے استعفے نوں جی آیاں نوں آکھیا۔ اوہناں دا آکھنا ہے کہ مشرف دے استعفے نال ملک وچ ہوون والی کھچ دھرو مُک جاوے گی۔
کراچی سٹاک ایکسچینج دے سینئر ممبراں صدیق دلال، عقیل کریم ڈھڈی، کراچی چیمبر دے گذریل پردھان سراج قاسم تیلی، فیڈریشن چیمبر آف کامرس دے گذریل پردھان طارق سعید نے میڈیا نال گل کردیاں آکھیا کہ مشرف دے استعفے دے فیصلے نال ملک وچ بھنبھل بھوسے دی صوتحال مُک جاوے گی۔
سٹاک بروکراں دا آکھنا سی کہ صدر دے استعفے نال منڈی وچ کئی مہینیاں توں چل رہی مندی مُک جاوے گی تے مقامی تے باہرلے سرمایہ کاراں دا بھروسہ ودھے گا۔ پچھلے دنان ایوان صنعت و تجارت کراچی اتے وفاق ایوان ہائے صنعت و تجارت نے صدر نوں اپنیاں چٹھیاں وچ ملک دی بھلیائی لئی استعفیٰ دیون دی صلاح دتی سی۔
