تیل دیاں قیمتاں وچ وادھے نے ساری دنیا وچ زندگی دے ہر شعبے تے اثر پایا ہے تے اُچیچا آون جاون وچ لوکاں دے مسئلے ودھے ہین۔ایندھن دیاں قیمتاں وچ وادھے دے نال ترقی پذیر ملکاں وچ لوک ہن آون جاون لئی اپنیاں گڈیاں دی بجائے پبلک ٹرانسپورٹ بوہتا ورتن لگے ہین۔ کجھ تے سائیکل نوں ترجیح دے رہے ہین۔ تیل دیاں قیمتاں وچ وادھے نے ترقی پذیر ملکاں نوں اُچیچا متاثر کیتا ہے کیوں جو اوتھے لوکاں دیاں آمدناں گھٹ ہین۔
جوزف میوند وموسیو دا نیروبی دی اک غریب وستی وچ رہندے ہین۔ اوہناں نوں اپنے گھروں کم تے جاون لئی روزانہ تن گھنٹے پیدل ٹرنا پیندا ہے کیوں جو اوہ بس دا کرایہ ادا نہیں کرسکدے۔ اوہ کہندے ہین جو حیاتی بوہت اوکھی ہوگئی ہے۔ تیل مہنگا ہوون توں مگروں میں ایہہ محسوس کیتا جو میرے لئی پیدل ٹرنا ہی چنگا ہے انج میں روزانہ دے خرچے لئی کجھ رقم بچا سکنا۔
سارے جگ وچ لوک تیل اسمان نال گلاں کردیاں قیمتاں دا مقابلہ کرن دے طریقے لبھ رہے ہین۔ انڈونیشیا تے کئی دوجے علاقیاں وچ لوکاں نے ایہدا حل پبلک ٹرانسپورٹ کڈیا ہے۔جکارتہ کمپیوٹر دی شوقین رینا کئی وار اپنی گڈی گھر چھڈ کے کم تے جاندی ہے۔ اوہ کہندی ہے کہ جدوں دا تیل مہنگا ہویا ہے میں بوہتا بس وچ سفر کرنی آں۔
حکومت دیاں کوششاں توں مگروں، جکارتہ دے احمد سویونو ورگے لوک پبلک ٹرانسپورٹ ورتن توں ولاوندے ہین۔ اوہناں دا کہنا ہے اوہناں نوں پبلک ٹرانسپورٹ پسند تے ہے پر اپنی کار وچ سوکھت بوہتی ہے۔تھائی لینڈ نے بنکاک دے ٹریفک دے مسئلیاں نال نبڑن لئی اک وڈی رقم نال سکائی ٹرین تے بساں دا نیٹ ورک شروع کیتا ہے۔ پر سوبھویا تورن اپنے گھر تے دفتر تیکر ویہہ کلو میٹر دا پینڈا طے کرن لئی نت دو گھنٹے ڈرائیو کردیاں ہین۔
جدوں اسیں امریکہ تے نظر پاونے ہاں تے پچھوکڑ توں اک وکھری صورت نظر آوندی ہے۔ امریکہ وچ اہناں وچاں وچ کسے بس یاں ٹرین وچ سیٹ لینا واہوا اوکھا ہے تے ایہدا کارن ہے اک لٹر پٹرول اک ڈالر مُل۔
امریکہ دا دوجا سب توں وڈا شہر لا اینجلس اپنی فلمی صنعت تے بھیڑی ٹریفک دی بناء تے مشہور ہے۔ فاربینز ڈاٹ کام موجب لاس اینجلس وچ ہر ڈرائیور جنا ویلا ٹریفک وچ پھسیا رہندا ہے، کے اہنوں جمع کیتا جاوے تے اوہ ویلا اک سال وچ تن دن دے بروبر بندا ہے۔
لاس اینجلس وچ ٹرانسپورٹ دا شعبہ بوہت سارے وادھیاں دے مگروں وی شہریاں دیاں لوڑاں لئی کافی نہیں ہے تے شہری اپنیاں کاراں نوں ورتن لئی تیار نہیں ہین۔ پر رامونا مارکس اہناں لوکاں وچ رلتی ہین جیہڑے سائیکل تے دفتر جاندے ہین ۔ ہن انج دے لوکاں دی گنتی ودھ رہی ہے۔
اوہناں دا کہنا ہے اوہ صرف پیسہ بچا رہیاں ہین سگوں لاس اینجلس دے فری ویز تے گڈی چلاون دی پریشانی توں وی چھٹکارا مل گیا ہے۔پر ایہہ نہیں ہے جو ہر کسے نوں اپنی پسند دا حل مل جاوے۔ کینیا وچ جوزف میوندو مسیو دا اپنے قصبے موکورو توں اپنے کم دی تھاں بس راہیں جانا چاہندے ہین۔ پر ایہدا کرایہ اک ڈالر تے ویہہ سینٹ بندا ہے جدوں کہ اوہناں دی روزانہ دی آمدن صرف ڈیڈھ ڈالر ہے۔
اوہناں دا کہنا ہے جو تن گھنٹے روزانہ چلن نال صحت خراب ہورہی ہے۔ اوہ پیدل اپنے کم تے جاندے ہین تے اوہناں نوں آس ہے جو انج دا ویلا آوے گا جدوں اوہناں دی آمدن اینی ہووے گی جو اوہناں نوں پیدل ٹرن دی لوڑ نہیں پوے گی۔
