حکومت مالی گھاٹا گھٹ کرن تے میکرو اکانامک استحکام لئی پبلک سیکٹر ترقیاتی پروگرام وچ سو ارب روپئے دی کٹوتی کرے گی۔وفاقی وزیر خزانہ نوید قمر موجب حکومت مالی سال وچکار خسارہ گھٹ کر کے 4.7 فیصد تے لیاونا چاہندی ہے جیس لئی ترقیاتی بجٹ وچ گھاٹے کارن کئی ہور فیصلے کیتے جارہے ہین۔
ملک وچ پٹرولیم شیواں دیاں قیمتاں وچ ہن تیکر چھ واری وادھا کیتا جاسکدا ہے، گیس دیاں قیمتاں ودھائیاں جاچکیاں ہین جدوں کہ بجلی دیاں قیمتاں وچ وادھا ہن کجھ ہی چر دی گل لگدی ہے۔ وزیر خزانہ دا کہنا ہے جو حکومت دے ساہمنے زرمبادلہ دے ذخیریاں وچ کمی بوہت وڈا مسئلہ ہے۔ چیتا رہوے جو ذخیرے دس ارب ڈالر دی پدھر توں گھٹ ہو گئے ہین۔
نوید قمر دا کہنا ہے جو تیل دیاں عالمی قیمتاں وچ کمی دا فیدا ورتن والیاں نوں اُس ویلے ہووے گا جدوں حکومت نوں دتی جاون والی زرِ تلاقی مُک جاوے۔ سارے سرکاری اداریاں تے محکمیاں دی ضمنی گرانٹ روک دتی گئی ہے تے غیر ملکی دوریاں وچ کٹوتی دے حکم وی جاری کیتے گئے ہین۔
انج دے ترقیاتی منصوبیاں لئی جاری کیتی گئی رقم روکی جاوے گی جنہاں دے اقتصادی فیدے نہ ہوون۔ پر اوہناں نے ترقیاتی خرچیاں وچ گھاٹے نوں ہرکھ آکھیا۔ایس حکومتی فیصلے توں مگروں پنج سو پنجاہ ارب روپئے دا ترقیاتی پروگرام چار سو پنجاہ ارب روپئے رہ جاوے گا۔
عالمی مالیاتی ادارے دا دبا ہے جو بجٹ خسارہ 4.3 فیصد گھٹ کیتا جاوے۔ پر حکومت نے اہنوں ناممکن کہندیاں ہوئیاں پک کروایا جو خسارہ 4.7 فیصد توں نہیں ودھن دتا جاوے گا۔
