معیشت نوں بحران وچوں کڈھن لئی پاکستان آئی ایم ایف دی مدد لے سکدا ہے:ماہر

عالمی مالیاتی ادارے یعنی آئی ایم ایف دی ٹیم باراں ستمبر نوں کراچی اپڑ رہی ہے۔ ایہہ ٹیم پربندھیاں نال معیشت نوں بحران وچوں کڈھن بارے کاروائیاں تے ادارے دی مدد دے حوالے نال گل بات کرے گی۔وختاں وچ پئی پاکستانی معیشت نوں آسرا دیون لئی آئی ایم ایف سنے مالیاتی اداریاں دی مدد دی بوہت لوڑ ہے تے ایس گل دے بوہت امکان ہین جو پاکستان اک وار پھیر آئی ایم ایف پروگرام توں مدد لوے گا جیہدے لئی سخت اقتصادی فیصلے کرنے ہوون گے۔

ملک وچ تیل گیس تے بجلی دیاں قیمتاں اہناں اداریاں ولوں دبا تے بحالی معیشت ول ہور سخت فیصلیاں دی آس کیتی جارہی ہے۔ پچھلی حکومت وچ پاکستان آئی ایم ایف پروگرام توں باہر آگیا سی پر اک وار پھیر ایس گل دا ڈر پیدا ہو گیا ہے جو ڈفالٹ توں بچن لئی اوہنوں آئی ایم ایف دی مدد دی لوڑ ہووے گی۔

ایس ویلے ملک دے زرمبادلہ دے ذخیرے نو ارب ڈالر دی پدھر تیکر ہین۔ پچھلے اٹھاں مہینیاں وچ ذخیرے ست ارب ڈالر گھٹے ہین۔ روپئے دی قدر وی ویہہ فیصد توں ودھ کمی دے نال ستتر روفے فی ڈالر توں اُتے ہے۔ تجارتی تے کرنٹ اکاؤنٹ خسارہ ودھ رہیا ہے۔ افراطِ زر تناں دھاکیاں دی اُچی پدھر تے ہے۔

پاکستان نوں در آمدات تے باہرلیاں ادائیگیاں لئی زرمبادلہ دی لوڑ ہے جیہدے لئی عالمی مالیاتی اداریاں دے نال نال امریکہ تے ہور ترقی یافتہ ملکاں ولوں مالی امداد تے اقتصادی تعاون دے حصول دیاں کوششاں کیتیاں جارہیاںہے ہین۔
ماہر صورت حال نوں معیشت دا بحران کہہ رہے ہین۔