اسلام آباد وچ چار زرعی فارماں دی مشکوک حالت وچ الاٹمنٹ

اسلام آباد وچ چار زرعی فارماں دی تقریبا یقینی الاٹمنٹ بڑے مشکوک حالات وچ ہوئی ہے دسیا جاندا ہے جو ایہہ الاٹمنٹس مولانا فضل الرحمن دی جمعیت علمائے اسلام دے کجھ بندیاں نوں ہوئی ہے۔ بھاویں جمعیت علمائے اسلام (ف) دے ترجمان اہنوں رد دے ہین پر سرکاری وسیلیاں تصدیق کیتی ہے کہ سی ڈی اے تے اک متاثرہ بندے نوں اوہ مہنگا سرکاری پلاٹ دیون لئی بوہت دبا ہے جیہدے بارے کہیا جاندا ہے کہ اوہ اہناں پلاٹاں تے اپنے حق پہلے ہی جمعیت علمائے اسلام (ف) دے بندے نوں دے چکیا ہے۔ سی ڈی اے دی الاٹمنٹ اسکروٹنی کمیٹی دا اجلاس پچھلے ہفتے ہویا تے ایس وچ ' فضلا سن آف بانا '' کیس وچ چار زرعی پلاٹاں دی الاٹمنٹ دی منظوری دتی گئی جیہڑی کہ اک عشرے توں اگے پئی ہوئی سی۔

سی ڈی اے دی ٹاپ مینجمنٹ نوں کہیا گیا ہے جو اوہ ایس کیس تے کالھی نال کم کرے تے الاٹمنٹس کرے۔اک وسیلے نے خیال ظاہر کیتا ہے جو اہناں زرعی فارماں دی الاٹمنٹس اصل وچ پیپلز پارٹی تے جمعیت علمائے اسلام دے وچکار کسے ڈیل دا حصہ ہوسکدی ہے جیس ہیٹھ جمعیت علمائے اسلام نے چھ ستمبر دیاں صدارتی چوناں وچ آصف علی زرداری دی حمیت کرنا ہووے۔ پر جمعیت علمائے اسلام دے سیکرٹری مولانا امجد نے ایہدی تردید کردیاں ہوئیاں کہیا ایہہ سارا کجھ ڈس انفارمیشن ہے۔ایس گل نوںرد کردیاں ہوئیاں کہ مولانا فضل الرحمن تے آصف علی زرداری وچ کسے قسم دی ڈیل ہوئی ہے، جے یو آئی (ف) دے ترجمان نے کہیا جمعیت دا پچھوکڑ دا ٹریک ریکارڈ ثابت کردا ہے جو اوہناں دی جماعت کسے وی انج دے معاملے وچ رلتی نہیں رہی۔

پیپلز پارٹی دی اک ترجمان فرزانہ راجہ نال رابطہ کیتا گیا تے اوہناں نے وی صدارتی چوناں لئی پیپلز پارٹی تے کسے دوجے اتحادی نال ڈیل نوں ردیا۔ اوہناں کہیا ایہہ سب قیافے ہین۔ اوہناں کہیا ملکی جمہوری طاقتاں نے وفاق نوں بچاون لئی زرداری نوں ووٹ دتا۔

فائلاں وچ بھاویں ایس فیضیاب ہوون والے ایس وڈے بندے دا ذکر نہیں ہے پر سی ڈی اے دے عہدیدارنے ناں نہ دسن دی شرط تے منیا کہ اوہناں تے بوہت دبا ہے جو جو اوہ فضلا کیس وچ چھیتی توں چھیتی الاٹمنٹس کرن۔