پنج فیصد منافع رکھن توں مگروں وی بینکاں توں رقم کڈوان دا سلسلہ جاری

گورنر اسٹیٹ بینک ڈاکٹر شمشاد اختر ولوں کھاتیداراں دے گھٹوگھٹ منافع پنج فیصد رکھے جاون دے مگروں وی بینکاں توں رقماں کڈوان دا کم جاری ہے۔ مرکزی بینک ولوں جاری ہوون والے مانیٹری ڈیٹا موجب مالی سال دے پہلے مہینے وچ اکاؤنٹس وچ موجود رقماں وچ 162 ارب روپئے دی کمی ویکھی گئی ہے۔

22 مئی 2008 نوں گورنر اسٹیٹ بینک ڈاکٹر شمشاد اختر نے عبوری مانیٹری پالیسی دے اجرا دے موقعے تے کھاتیداراں نوں اک فیصد شرح منافع دیون تے بینکاں تے تنقید کردیاں ہوئیاں کھاتیاں تے گھٹو گھٹ منافع پنج فیصد کرن دا حکم جاری کیتا سی پر ایس دے مگروں وی کھاتیاں توں کمی دا کم جاری ہے۔

معیشت دے ماہراں دا کہنا ہے جو مہنگائی دی شرح تریہہ فیصد توں ودھ ہے جدوں کہ بینک افراط زر دے مقابلے وچ منفی شرح منافع دے رہے ہین۔ ایسے کارن لوک اپنیاں بچتاں نوں روز دے خرچے پورے کرن لئی ورت رہے ہین۔