جولائی۔ اگست وچ زرمبادلہ ترسیلاں وچ 23 فیصد وادھا: وسیلے
وچار ڈیسک
September 14th, 2008
اقتصادی اوکڑاں وچ گھرے پاکستان لئی باہرلے ملک پاکستانیاں ولوں ترسیلاں دی شکل وچ تگڑی مدد مل رہی ہے۔ ایس مالی سال توں پہلوں دو مہینے یعنی جولائی تے اگست دے وچکار ترسیلاں وچ تئی فیصد توں بوہتا وادھا ریکارڈ کیتا گیا تے دو مہینیاں وچ اک ارب بائی کروڑ ڈالر ملک وچ گھلے گئے۔
امریکہ، سعودی عرب، برطانیہ، مشرق وسطیٰ دیاں ریاستاں زرمبادلہ گھلن والے ملکاں وچ سب توں پہلے ہین۔ پر ملکی زرمبادلہ دے ذخیریاں وچ پچھلے اٹھاں مہینیاں وچ مسلسل کمی آوندی رہی ہے۔ پر پچھلے ہفتے کجھ بہتری ویکھن وچ آئی۔ تجزیہ کار محمد سہیل نے حکومت ولوں کاروائی دی لوڑ تے زور پاوندیاں ہوئیاں کہیا مناسب فیصلے کر کے صورتحال چنگی کیتی جاسکدی ہے۔
اوہناں دے خیال وچ زدمبادلہ دی صورت حال وچ کجھ بہتری آچکی ہے۔ جدوں کہ حالی وی زرمبادلہ پنج سال دی گھٹ پدھر تے ہے ۔' ملک دے زرمبادلہ دے ذخیرے اٹھ مہینے وچ سولاں ارب ڈالر توں گھٹ کے نو ارب ڈالر تے آگئے ہین۔ ملک وچ ڈالر دی طلب ودھن، تجارتی خسارے وچ وادھے تے توازن ادائیگی تے دبا دے نتیجے وچ روپئے دی قدر وچ وی تئی فیصد توں ودھ کمی ہو چکی ہے تے ایس ویلے ڈالر۔ روپیہ شرح مبادلہ چھہتر روپئے پنجاہ پیسے دی پدھر تے ہے۔ ڈر ظاہر کیتا جارہیا ہے جو روپئے دی قدر وچ آون والے مہینیاں وچ ہور کمی ہوسکدی ہے۔
