بینک کریسی پروٹیکشن لئی امریکہ دے چوتھے وڈے سرمایا کاری بینک لیہمن برادرز دی درخواست توں مگروں سٹاک مارکیٹاں وچ مندی دا رجحان جاری ہے۔ یورپی مارکیٹاں نوں دوجے دیہاڑ وی بوہت اوکڑاں دا ساہمنا رہیا تے برطانیہ دی ایف ٹی ایس سی 100 تے جرمنی دی دیکس دوہویں اک اعشاریہ ست فیصد تھلے گئیاں۔
جاپان جنوبی کوریا تے ہانگ کانگ وچ شئرز دیاں قیمتاں وچ پنج فیصد توں ودھ گھاٹا آیا۔ لیہمن گھراں دی خریداری لئی دتے جاون والے قرضیاں یاں مارٹگیج دے کارن بحران دا شکار ہویا ہے تے ہن بحران توں نکلن لئی اپنے اہم اثاثے بار کلیز نوں ویچن والا ہے۔
شئرز دے وڈے برطانوی ادارے ایف ٹی ایس سی ہنڈرڈ وچ شئرز اکیانوے پوائنٹ توں 5113 تیکر تھلے گئے۔ جدوں کہ جرمنی وچ شئرز دے وڈے ادارے ڈیکس دا انڈیکس اک سو چھ پوائنٹ توں 5959 تے فرانس دا سی اے سی چالی 65 پوائنٹ توں 4104 پوائنٹ تھلے گیا۔
پیر امریکی مارکیٹاں لئی 9/11 توں مگروں آون والا بھیڑا دیہاڑ سی تے دن دے اخیر تے ڈاؤ جان انڈیکس 504,49 پوائنٹ تے 4,42 دی کمی دے نال 10917, 51 پوائنٹ تے بند ہویا۔
جاپان وچ نکئی 225 انڈیکس وچ پنج فیصد کمی آئی جیہڑی پچھلے تناں سالاں وچکار سب توں گھٹ پدھر تے سی۔ جنوبی کوریا تے ہانگ کانگ دیاں مارکیٹاں وچ مندی دی شرح چھ فیصد تے ہانگ کانگ وچ تن فیصد رہی۔ چین وچ شیئر دے بھاء 4,47 ڈگے تے بیجنگ نے پیر نوں ایس مالی سال وچ پہلی وار شرح سود وچ کمی کیتی۔
بینچ مارک شنگھائی کمپوزٹ انڈیکس جیہڑا اے تے بی دوہواں طرحاں دے شئرز نوں کور کردا ہے 93,04 پوائنٹ دے نال 1974,39 دی پدھر نوں چھوندا ہویا 1976,64 تے بند ہویا۔
تائی پائی تے سنگا پور دیاں مارکیٹاں وچ بوہت مندی دا رجحان ویکھن وچ تے ایہو رجحان آسٹریلیا تے نیوزی لینڈ وچ وی ویکھن وچ آیا بھاویں ایتھے مندی گھٹ سی۔
بینک سٹاکاں نوں وی واہوا دھکا لگیا ہے تے لندن وچ ایچ بی او ایس باراں فیصد رائل بینک آف سٹاک لینڈ ست فیصد توں تھلے گئے۔ لیہمن برادرز دے کجھ کاروبار نوں خریدن دا عزم ظاہر کرن والے بارکلے بینک دے شئرز دے بھاء وچ پنج فیصدتوں ودھ دی کمی ویکھن وچ آئی۔
فرانس تے جرمنی دے بینک سٹاکاں وچ چار توں تن اعشاریہ ست فیصد تیکر کمی ویکھن وچ آئی۔امریکہ دے یورپ دے مرکزی بینکاں وانگوں ایشیا دے مرکزی بینکاں نے وی مارکیٹاں نوں سہارا دیون دیاں کوششاں کیتیاں ہین۔
بینک آف جاپان نے بینکاں نوں دو اعشاریہ پنج ٹریلین ین (تیراں ارب پاؤنڈ) دا سرمایا دتا ہے جدوں کہ ہندوستان تے آسٹریلیا نے وی سرمایا مارکیٹاں وچ سرمایا دتا ہے۔ امریکہ دے فیڈرل ریزرو نے ہنگامی قرضیاں دی سکیم کھلاری تے یورپ تے برطانیہ نے اپنے مالیاتی نظاماں نوں اُنتالی ارب ڈالر دا سرمایا دتا ہے۔
