اسلام آباد وچ کجھ دیہاڑ پہلوں ہوون والے بمب دھماکے توں مگروں پاکستان دے غیر ملکی زرمبادلہ دے ذخیریاں وچ ہور نو ارب ڈالر دی کمی ہوئی ہے تے ایہہ ذخیرے گھٹ ہو کے اٹھ ارب بیاسی کروڑ ڈالر رہ گئے ہین۔اسٹیٹ بینک آف پاکستان ولوں جاری کیتے گئے اعلامیے موجب پنجھی ستمبر تیکر مرکزی بینک دے کول پنج ارب چالی کروڑ ڈالر تے کمرشل بینکاں دے کول تن ارب اکتالی کروڑ ڈالر دے ذخیرے موجود سن۔
ایس مہینے دے پہلے ہفتے تیکر اسٹیٹ بینک دے کول غیر ملکی زرمبادلہ دے ذخیرے نو ارب اکانوے ڈالر سن جیہدے وچ ہولی ہولی کمی ریکارڈ کیتی گئی ہے تے ہن تیکر ایہدے وچ تن سو چھ ملین ڈالر دی کمی ہو گئی ہے۔ دوجے پاسے پاکستانی روپیہ جمعرات نوں وی امریکی ڈالر دے مقابلے وچ گھٹ پدھر تے رہیا تے اوپن مارکیٹ وچ اک امریکی ڈالر دے مقابلے وچ پاکستانی کرنسی دی قیمت اٹھتر روپئے تیکر اپڑ چکی ہے۔ ماہراں موجب ملک دے ودھدے ہوئے تجارتی خسارے نال باہرلیاںا دائیگیاں دا حجم ودھ رہیا ہے جیہدے ہیٹھ روپیہ دبا دا شکار ہے۔
تجزیہ کار مزمل اسلم کہندے ہین میرئیٹ بمب دھماکے نال معیشت نوں دھکا لگیا ہے ایس دھماکے توں مگروں بوہت سارے لوکاں دے ذہناں وچ بھیڑی وچار پیدا ہوئی ہے جدوں پاکستان دے سب توں بوہتے محفوظ علاقیاں وچ انج ہوسکدا ہے تے پھیر کِتے وی کجھ ہوسکدا ہے۔
اوہناں موجب اُچیچا غیر ملکی سرمایا کاراں دے ذہناں وچ ایہہ گل بیہہ گئی ہے۔ ایسے کارن اوہ ملکوں ٹر وی گئے ہین تے ایسے حساب نال سرمایا کاری وی جارہی ہے۔
مزمل اسلم موجب لوکاں وچ ڈر ہے تے اوہ اپنے سرمائے تے جان مال نوں محفوظ نہیں سمجھ رہے۔ معیشت لئی ایہہ شیواں چنگیاں نہیں ہوندیاں۔ باہروں زرمبادلہ تے سرمایا کاری واپس لیاندی جاوے۔ دوریاں توں تے کجھ حاصل نہیں ہووے گا۔' کراچی اسٹاک مارکیٹ وچ وی محدود پیمانے تے کاروباری کاروائیاں جاری ہین تے جمعرات نوں کے ایس ای ہنڈریڈ انڈیکس چھ اعشاریہ چھ پوائنٹس دی کمی توں مگروں نو ہزار اک سو چوراسی پوائنٹس تے بند ہویا ہے۔
