بچتاں تے ودھ شرح سود: حکومت قرضے لین توں باز نہیں آئی

ڈائریکٹوریٹ جنرل آف نیشنل سیونگز نے ادارے دی بچت اسکیماں تے شرح منافع ودھا دتا ہے۔تجزیہ کاراں دا کہنا ہے جو ایس فیصلے توں اک پاسے تے اہناں سکیماں وچ سرمایا کاری ودھے گی تے دوجے پاسے اہناں وچ سرمایا کاری کرن والے نکے وڈے سرمایا کاراں نوں چنگا منافع مل سکے گا۔ نویں شرح منافع یکم اکتوبر توں لگے لگی۔

قومی بچت اسکیماں ہمیش ہی نکے سرمایاداراں، خصوصا گھریلو بچتاں تے ریٹائرڈ بندیاں دی جمع پونجی لئی محفوظ تے منافعے بخش رہیاں ہین پر اہناں اسکیماں وچ ادارے تے وڈے سرمایا کار وی سرمایا کاری کردے رہے ہین۔

جدوں ملک وچ سود دی شرح گھٹ سی تے حکومت نے وڈے اداریاں تے اہناں اسکیماں وچ سرمایا کاری تے روک لائی سی پر مگروں حکومت نے اداریاں نوں اسکیماں وچ سرمایا کاری دی اجازت دے دتی۔

حکومت نوں مالی بحران دا ساہمنا ہے تے حکومتی خرچے پورے کرن لئی اسٹیٹ بینک توں قرضے لئے جارہے ہین جیہدے تے ماہر نکتہ چینی کر رہے ہین تے آپوں اسٹیٹ بینک وی ایس صورت حال توں راضی نہیں ہے۔

نویں حکومت نے وی اسٹیٹ بینک توں قرضے نہ لین دی پک کروائی سی پر حالی تیکر صورت حال وچ کوئی بدلی نہیں ہوئی۔ نویں مالی سال دے دوہواں مہنیاں یعنی جولائی تے اگست وچ حکومت نے اپنیاں لوڑاں پوریاں کرن لئی اک سو باٹھ ارب روپئے توں بوہتے قرضے لئے ہین تے ایہہ سلسلہ جاری ہے۔

حکومت دے ایس دعوے بارے وی شک ہورہیا ہے جو ایس سال حکومت اسٹیٹ بینک توں لئے گئے قرضے واپس کردیوے گی۔