امریکی کانگرس دے ہیٹھلے ایوان نے وال سٹریٹ نوں بچاؤن لئی صدر بُش دے 700 ارب ڈالر دے مالی منصوبے نوں رد دتا ہے جیہدے نال ای امریکی سٹاک مارکیٹ 700 پوائنٹ ڈگ پئی ہے تے ایس نال دنیا دیاں دوجیاں سٹاک مارکیٹاں وچ وی نقصان ہووے گا۔
امریکہ وچ ڈُبے ہوئے قرضیاں نوں بچاؤن لئی صدر بُش دے منصوبے تے حکومت اتے دوجے قانون بناؤن والیاں وچکار بڑی گرما گرمی ہوئی سی تے مگروں ایس منصوبے نوں 205 دے مقابلے وچ 228 ووٹاں نال رد دتا گیا ہے۔ بُش دی اپنی ریپبلکن پارٹی دے ممبر وی ایس منصوبے دے خلاف سن تے دو تہائی گنتی نے ایس دی حمایت توں نانہہ کر دتی سی۔
بش حکومت نے قانون بناؤن والیاں دا ترلا پایا سی کہ اوہ ایس بل نوں منظور ہو لین دیون کیوں جو ایہدے نال مالی نظام چنگا ہو جاوے گا۔ بش حکومت کئی بینکاں دے ڈُبے ہوئے قرضیاں دے بدلے ست سو ارب ڈالر دینا چاہوندی ہے تاں جو ملک نوں ایس اوکھے ویلے چوں کڈھیا جا سکے۔
وائٹ ہاؤس وچ بُش نے منصوبہ رد ہوون تے آکھیا ہے کہ اوہنوں ایس منصوبے دے ردے جاون تے بڑی مایوسی ہوئی ہے۔ اوہدا آکھنا سی کہ اسیں ای وڈی اوکھت وچوں نکلن لئی اک وڈا منصوبہ دتا سی۔ ایس منصوبے ہیٹھ حکومت ست سو ارب ڈالر ورت کے مکاناں دی خریداری لئی بینکاں ولوں دتے گئے اوہ قرضے خریدنا چاہوندی ہے جیہڑے ڈُب چُکے ہین۔ حکومت ایہہ پیسہ بانڈ جاری کر کے لینا چاہوندی ہے۔
