دنیا دے معاشی بحران دی جڑ امریکہ ہے: روسی وزیر اعظم پیوٹن
وچار ڈیسک
October 1st, 2008
روسی وزیر اعظم ولادیمیر پیوٹن نے امریکہ نوں کھریاں کھریاں سناؤندیاں آکھیا ہے کہ اوہ معاشی بحران نال نجٹھن وچ ناکام ہو گیا ہے جیہدا اثر دنیا دیاں ساریاں منڈیاں تے ہویا ہے۔ پیوٹن دا بیان جیہنوں امریکہ وچ چنگیاں نظراں نال نہیں ویکھیا جاوے گا وچ اوہنے 700 ارب ڈالر دا امدادی منصوبہ ردن تے کانگرس دی نکھیدی کیتی ہے کیوں جے ایس معاشی بحران دا اثر روسی معاشی منڈیاں تے بہت بھیڑا ثابت ہویا ہے۔
ماسکو وچ اکر سرکاری اکٹھ وچ پیوٹن دا آکھنا سی کہ ''معاشی اتے مالی منڈیاں وچ جو کجھ وی بھیڑا واپر رہیا ہے اوہد مُڈھ امریکہ ہی ہے۔ ایہہ اک اصلی تے وڈا مسئلہ ہے جیہنوں اسیں سارے بھگت رہے ہاں۔ سبھ توں وڈی ہرکھ والی گل ایہہ ہے کہ امریکہ اہناں حالات وچ لوڑیندے فیصلے کرن وچ ناکام ہو گیا ہے۔ ایہہ کجھ بندیاں دی غیر ذمے واری نہیں سگوں پورے نظام دی غیر ذمے واری ہے۔''
روسی معاشی منڈیاں دے آنکڑے مئی دی اُچی پدھر توں پنجاہ فیصدی ڈگ پئے نیں تے پچھلے دو ہفتیاں وچ وپار کئی واری روکنا پیا ہے۔ معاشی ماہراں دا آکھنا ہے کہ روس دے جارجیا نال اجوکے جھیڑے پاروں باہرلے ملکاں وچوں روس وچ سرمایہ لاؤن والیاں دا بھروسہ گھٹ گیا ہے۔ ایس توں اڈ روسی حکومت دا لہندے دیاں کمپنیاں نال مندا ویہار وی ایس مسئلے دا مُڈھ ہے۔
ولادیمیر پیوٹن دا آکھنا ہے کہ روس 2009 ء دے بجٹ وچ 175 بلین روبل ملک دیاں معاشی منڈیاں دی مدد لئی لاوے گا۔
