امریکی ایوان نے جمعے دے دیہاڑے ڈُبے ہوئے بینکاں اتے معاشی بحران نوں سانبھن لئی 700 ارب ڈالر دا امدادی مالیاتی بل 92 ووٹاں دی اکثریت نال منظور کر لیا ہے۔ بل دے حق وچ 263 ووٹ پئے تے 171 ممبراں نے بل دی مخالفت کیتی۔ بل دی حمایت حکومت اتے اپوزیشن دوہاں پاسیوں ہوئی۔ پردھان بش دا آکھنا ہے کہ اوہ جمعے دے دیہاڑے ای بل تے دستخط کر دیون گے۔
پردھان بُش دا آکھنا ہے کہ ایس کم نال ملک دی معیشت توں خطرہ ٹل جاوے گا۔ فیڈرل ریزرو دے چیئرمین بین دا آکھنا ہے کہ ایس بل نال معاشی منڈیاں دی صورتحال چنگی ہووے گی تے گھراں اتے وپاراں نوں کھلا قرضہ لبھے گا۔ سپیکر نینسی پلوسی دا آکھنا ہے کہ ایس رقم دا پورا پورا حساب کتاب رکھیا جاوے گا۔ ایوان دے گھٹو گھٹ 21 ممبراں دا آکھنا ہے کہ اوہناں نے اپنا فیصلہ بدلیا ہے۔
سینیٹ وچ منظوری توں پہلوں ای آس سی کہ اُکا سینیٹ ای نہیں سگوں ایوان نمائندگان وی ایس بل دی منظوری دے دیوے گا۔ ایوان نمائندگان نے پہلوں ایس بل نوں رد دتا سی کہ مالیاتی اداریاں نوں انج دی امداد دے کے بچاؤنا ٹیکس دیون والی لوکائی نال دھرو ہووے گا۔
ایوان وچ نامنظور ہوون مگروں ایس بل وچ بدلیاں کیتیاں گئیاں جیہناں وچ اچیچا مالیاتی اداریاں دے موہریاں تے اُچ پدھری افسراں دیاں تنخواہاں گھٹائیاں گئیاں تے اوہناں دی نوکری مُکن ویلے دتا جاون والا پیسہ وی گھٹایا گیا۔ ایس توں اڈ عام لوکائی دیاں بچتاں تے حکومتی ضمانت دی حد نوں اک لکھ ڈالر توں ودھا کے ڈھائی لکھ ڈالر کر دتا گیا۔
