امریکی بینکاں مگروں پورپی بینکاں دے ڈُبن دا وی خطرہ
وچار ڈیسک
October 6th, 2008
برطانیہ دے اک معاشی اخبار نے دسیا ہے کہ امریکا دے مقابلے وچ ہورپی بینکاں دی بیلنس شیٹ بہتی ماڑی ہے تے اوہناں دے ڈُبن دا خطرہ وی بہتا ہے۔
دی اکانومسٹ دے موجب امریکا دے بینکاں نے اوسط اک ڈالر دے کھاتیاں تے 96 سینٹ دا قرضہ دتا جدوں کہ پورپی بینکاں نے اوسط اک پاؤنڈ دے کھاتیاں تے اک اعشاریہ چالی پاؤنڈ قرضہ دتا۔ ایس لئی باقی دی رقم پوری کرن لئی یورپی بینک منڈی وچوں قرضہ چُکن تے بہتے مجبور نظریں آون گے۔
اخبار نے لکھیا ہے کہ ایس ویلے منڈی وچوں پیسہ چُکنا مہنگا ہو گیا ہے اتے لندن انٹر بینک دی سُودی در چھ فیصد دے نیڑے ہے جدوں کہ اک سودے وچ بینک گیاراں فیصد در تے پیسہ چُکن لئی وی راضی ہین جیہڑا اجوکے بحران توں پہلوں دی مقابلے وچ پنج گُنا ودھ ہے۔
تجزیئے وچ ایس ڈر دا وکھالا کیتا گیا ہے کہ ایہہ مالیاتی بحران یورپ مگروں ایشیاء دیاں منڈیاں نوں وی ہلا کے رکھ دیوے گا انج ایہہ مالیاتی بحران معاشی بحران وچ بدل سکدا ہے۔ اخبار دا آکھنا ہے کہ تیل اتے ہور دوجیاں وستاں دے مُل وچ تھوڑ اتے پیسے دے کھلار وچ تھوڑ نوں ویکھدیاں مرکزی بینک جے سُودی در گھٹا دیون تے بینکاں تے ودھدا ہویا دباء گھٹ سکدا ہے۔
