ڈالر دے مقابلے وچ روپئے دی قدر وچ ہور کمی توں مگروں پاکستان دیوالیہ ہوون دے نیڑے نیڑے اپڑگیا ہے۔ڈالر روپئے نوں وچھاوندیاں ہوئیاں اٹھتر دی ریکارڈ پدھر توں ودھ گیا ہے۔ ایس سال دے مڈھ وچ روپئے دی قدر وچ اِکی فیصد کمی ہوئی ہے۔اسٹیٹ بینک دے کول صرف دوہواں مہینیاں دیاں درآمداں لئی زرمبادلہ دے ذخیرے موجود ہین جدوں کہ مالی تے کرنٹ اکاؤنٹ خسارہ جھلن دے ناقابل برداشت جدوں کہ مہنگائی وچ پنجھی فیصد توں ودھ وادھا ہویا ہے۔
اسٹینڈ رڈ اینڈ پورز نے پاکستان دی ساورن کریڈٹ ریٹنگ گھٹ کر دتی ہے جیہڑی دیوالیہ دی پدھر توں تھوڑی اُتے ہے۔ سنگا پور وچ آئی این بی بنک دے اکانومسٹ ٹم کونڈن نے کہیا ہے جو پاکستانی پربندھیاں نوں جھبدے ایہہ ظاہر کرن دی لوڑ ہے جو اوہ ادائیگیاں وچ توازن دے مالیاتی گیلپ نوں پورا کرن دی خوبی رکھدے ہین۔ تجزیہ کاراں دا کہنا ہے جو پاکستان دی آس سنگی ملکاں امریکہ تے سعودی عرب نال جڑی ہے کیہہ اوہ چھماہی دی جمہوری حکومت نوں کامیاب تے ات واد دے خلاف جنگ وچ فرنٹ لائن ملک نوں پاڑ ول ودھن توں روک سکدے ہین۔
امریکی مالیاتی فرم دے عہدے دار نے ناں نہ دسن دی شرط تے دسیا کہ صرف ایہو شے پاکستان نوں بچا سکدی ہے۔ ستائی دسمبر نوں مکن والے ہفتے وچ 8.13 بلین ڈالر دے زرمبادلہ دے ذخیریاں وچ چھ سو نوے بلین ڈالر دی کمی ہوئی۔درآمدی بلاں دی ادائیگی دے مستقل دبا دے کارن حکومت مرکزی بنک توں قرض لین تے مجبور ہوئی ہے۔ پہلی جولائی توں شروع ہوون والے مالی سال وچ حکومت ولوں سٹیٹ بنک توں قرضہ لین دی شرح سو فیصد توں ودھ چکی ہے ایس چر وچ حکومت نے سٹیٹ بینک توں 2.21 بلین ڈالر دی رقم لئی۔ پاکستانی بنکراں نے سرمائے دی ایس مسلسل کمی نوں روکن لئی سٹیٹ بینک توں ہنگامی کاروائیاں دی منگ کیتی ہے۔ سینئر بنکر نے ناں نہ ظاہر کرن دی شرط تے دسیا کہ سٹیٹ بینک نوں چھیتی کجھ کرنا چاہی دا نہیں تاں نظام دی ناکامی دا خطرہ ہے۔
