عالمی مالیاتی بحران کئی ترقی پذیر ملکاں نوں لے ڈبے گا:صدر عالمی بنک

عالمی بنک دے صدر رابرٹ زویملک نے کہیا ہے جو موجودہ عالمی بحران کئی ترقی پذیر ملکاں نوں لے ڈبے گا۔ اہناں خیالاں دا وکھالا اوہناں نے آئی ایم ایف تے ورلڈ بینک دے ورہے وار اجلاس توں پہلوں اک خطاب وچ کیتا۔ موجودہ مالیاتی بحران دے حوالے نال خطرے دی گھنٹی وجاوندیاں ہوئیاں اوہناں کہیا عالمی معیشت نوں کثیر الجہتی نیٹ ورک دی لوڑ ہے۔

آئی ایم ایف دے تجربے دا ناں لیندیاں ہوئیاں اوہناں کہیا ایہدے وچ صرف بحراناں دے حل دی بجائے بحراناں توں بچن دے نظام تے توجہ دینی چاہی دی ہے۔ اوہناں جی سیون دی کارکردگی دی نکھیندی کردیاں ہوئیاں کہیا ایہہ ستھ صحیح کم نہیں کر رہی سانوں اک چنگے گروپ دی لوڑ ہے ایس گروپ وچ اقتصادی تے مالیاتی تعاون لئی جی سیون دے موجودہ ملکاں دے نال نال برازیل، بھارت، میکسیکو، روس ، سعودیہ ، چین تے جنوبی افریقہ نوں رلاونا ہووے گا۔

انج ایہہ گروپ دنیا دی آبادی دے چھونجاہ فیصد جدوں کہ اقتصادی پیداوار دے ستر فیصد دی نمائندگی دا اہل ہو جاوے گا۔ پر اوہناں نے کہیا نواں گروپ جی چوداں نہیں ہوونا چاہی دا سانوں پرانے گروپ دی پھیر بنتر کر کے کوئی نویں شے نہیں بناونی چاہی دی سگوں سانوں اک لچکدار ادارہ بناونا چاہی دا جیہدے وچ رکناں دی کوئی حد نہ ہووے۔ اوہناں کہیا آئی ایم ایف تے ورلڈ بینک وچ وی اصلاحواں دی لوڑ ہے۔