معیشت دی بحالی لئی امریکی مرکزی بینک نے سود دی شرح گھٹا دتی

امریکہ دے فیڈرل ریزرو نے بدھ نوں شرح سود وچ کمی دا اعلان کیتا تاں جو تاجر اک وار اپنے کاروبار پھیر توں چلاون لئی بینک توں قرضے لے سکن۔ فیڈرل ریزرو دے چیئر مین بین برنانکے دا کہنا ہے جو سٹاک مارکیٹ وچ بحران دی موجودہ صورت حال امریکہ دی معیشت تے ہی اثر نہیں پاوے گی سگوں اگلے سالاں وچ وی معیشت دی بحالی وچ کویل دا کارن بن سکدی ہے۔

امریکی مرکزی بینک نے کہیا اوہ اقتصادی کاروائی وچ اک وڈی کمی تے روپئے دے کھلار دے خطرے دی کمی پاروں سود دی بنیادی شرح وچ ادھے توں ڈیڈھ فیصد تیکر کمی کر رہیا ہے۔

عہدے داراں نوں آس ہے جو سود دیاں شرحاں وچ کمی نال بینکاں نوں قرضیاں دی رقم دی ادائیگی بحال کرن تے قرضیاں دے ایس بحران وچ کمی لیاون وچ مدد ملے گی جیہدے پاروں بوہت سارے کاروباری اداریاں لئی کم کرنا اوکھا ہو گیا ہے۔

حالیں چوکھیاں اسٹاک مارکیٹاں بھیڑی طرحاں ڈگیاں ہین۔ شرح سود وچ کمی دے اعلان توں مگروں یورپی اسٹاک مارکیٹ دے انڈیکس کاروبار دے مڈھ تے کالھی نال ڈگے پر مگروں کاروبار چڑھیا۔