امریکی حصص بازار تے اوہدی ڈگ دی ہوئی اقتصادی حالت نے دنیا دے سارے بازاراں دے نال ہندوستان دے بامبے سٹاک ایکسچینج نوں وی ہلا کے رکھ دتا ہے۔بازار وچ بھڑتھو پے ہوئے ہین۔ وڈے وڈے صنعتی اداریاں دے حصص دیاں قیمتاں ڈگ رہیاں ہین تے ایہدے کارن سرمایا کاراں وچ بے دلی کھلری ہوئی ہے۔ اوہ اہنوں کالی دیوالی من رہے ہین۔
ہندوواں وچ دیوالی نال نواں سال شروع ہوندا ہے تے ایس موقعے تے اوہ لکشمی یعنی روپئے دی پوچا کردے ہین پر ایس سال ہزاراں سرمایا کار اقتصادی طور تے لسے ہو گئے ہین جدوں کہ کئی دیوالیہ دے نیڑے ہین۔ پچھلے سال دی دیوالی ہندوستانی سرمایا کاراں لئی خوشیاں لیائی سی کیوں جو پچھلے ورہے دیوالی دے موقعے تے حصص دے مُل وچ پنجاہ فیصد وادھا ہویا سی تے سینسیکس تیراں ہزار توں اُنی ہزار تیکر اپڑ گیا سی۔
ایس سال بازار جدوں دس جنوری نوں اکی ہزار پوائنٹس تیکر اپڑ گیا سی اودوں سٹاک ایکسچینج وچ لوکاں نے ویلے توں پہلے دیوالی منائی سی۔ پٹاخے چلائے سن تے مٹھیائیاں ونڈھیاں سن۔
ایس موقعے تے ممبئی دا اک وڈا پوش وی سٹاکس وچ سرمایا کاری ول اُلریا ہویا سی تے لوکاں نے وڈے پیمانے تے کئی کمپنیاں وچ سرمایا لایا پر ہن سب توں بھیڑی حالت اوہناں نکے سرمایا کاراں دی ہے جنہاں نے ایس سال جنوری وچ ایجنٹاں ولوں سبز باغ وکھائے جاون توں مگروں بازار وچ رقم لائی سی۔
دلال سٹریٹ دے نیڑے بیہن والے پان ویچن والے وجے پان والا نے اپنی ساری حیاتی دی کمائی بازار دے حصص خریدن وچ لا دتی سی تے اج اوہ کنگلے ہو چکے ہین۔ وجے موجب ' میں پنجھی ورہیاں توں ایتھے کاروبار کر رہیاں پر میں کدی شیئر مارکیٹ وچ پیسہ نہیں لایا سی۔ شیئر بازار دے ایجنٹ جیہڑے مستقل گاہک ہین اوہناں نے مینوں پک کروایا کہ بازار بوہت اُتے جارہیا ہے تے میں کجھ مہینیاں وچ اپنا پیسہ ڈبل کرسکنا ایس لئی میں اپنے کجھ سنگیاں کولوں پیسے ادھار پھڑے تے دو وڈیاں کمپنیاں وچ سارا پیسہ لا دتا پر سارا کجھ ایہدے الٹ ہویا سی تے اج میں کنگال ہو گیاں۔ہن ڈر رہیاں جو ادھار رقم کیویں واپس کراں '۔
انج دی ہی کجھ حالت راجو سینڈ وچ والا دی ہے۔ مصروف تریب بمبئی دلال سٹریٹ تے کاروبار لئی آون والیاں نوں سینڈ وچ بنا کے دیون والے راجو نے اترپردیش وچ اپنا مکان بناون دا سفنا ویکھیا سی۔ اوہناں دے کول دو لکھ روپئے سی تے اوہناں نے اپنے اک ایجنٹ گاہک دے کہن تے ساری رقم اک وڈی کمپنی دے حصص وچ گھٹ چراں لئی لا دتی۔
اوہناں موجب ' پک سی کہ بازار اکی ہزار توں اُچا ہووے گا تے راتوں رات دو توں پنج لکھ روپئے دا مالک بن جاواں گا پر ہن رقم مک گئی ہے۔'
حصص بازار وچ سرمایا کاری کرن والے اک گجراتی بندے نے پچھان ظاہر نہ کرن دی شرط تے بی بی سی نوں دسیا کہ اوہ پوری طرحاں تباہ ہو چکیا ہے۔ اوہنے گھٹ مدت لئی بازار دیاں کئی کمپنیاں وچ سرمایاکاری کیتی سی پر اوہدا سرمایا ہن صفر ہو چکیا ہے۔
بازار دے ماہراں دا مننا ہے جو حصص بازار دے دوہواں اصولاں تے عمل کرن والا ہی ہمیش بچیا رہندا ہے اک تے ایہہ کہ اوہ لمے چر لئی سرمایا کاری کرے تے دوجا ایہہ کہ اوہ سارا سرمایا اکو واری کسے اک کمپنی وچ نہ لاوے۔
حصص بازار دے بروکر شانتی لال جین اپنا سٹھ فیصد توں ودھ سرمایا ایس مندی وچ گنوا چکے ہین۔ اوہ ایس ویلے گھر بیہہ گئے ہین تے صرف اپنے کمپیوٹر تے بازار دا پاسا پچھانن دی کوشش کر رہے ہین۔ اوہناں موجب ' بازار بنن وچ تے سرمایا کاری کرن وچ مہینیاں نہیں ورہے لگ جاندے ہین ہر بازار ڈگن لئی کجھ منٹ ہی بڑے ہوندے ہین جیہڑے تہاڈے کولوں تہاڈی دولت کھو لیندے ہین'۔
